程公的母親是助產護士，將寓所變成留產所，幫街坊接生，遇上窮等人家則不收分毫，「最難忘一次，41年日本仔兵臨城下，啲勝利友（搶匪）周街搶劫，搶到我屋企，爆開度門，我嗰陣八歲，嚇到唔識驚，好在樓下啲街坊大叫嚴大姑間屋都敢搞，啲勝利友聞言一哄而散，翌日屋企門口放咗兩包米同10罐牛肉」。
程公家境清貧，大他七歲的哥哥讀書很叻，更考上英國倫敦大學，母親供不起他放洋，幸得一名醫生幫助，哥哥成功入香港大學讀醫，「我排行中間最慘，哥哥讀醫，我只得輟學」。程公口說不公平，心裏敬重哥哥，一次哥哥不夠錢買顯微鏡，他做了兩個月苦力儲錢買顯微鏡送給哥哥。
程公奮鬥數十年，有了自己家庭及建築公司，閒餘經常參與廟街社區活動，「我好懷念當年廟街嘅舊建築，圓拱天花嘅平安戲院，好宏偉；更懷念係一班自細玩大、一齊去榕樹頭睇賣藝嘅老街坊。」