大摩今季喺谷草只得2場頭馬咁大把，喺23個馬房之中排包尾，不過今晚（13日）第六場三班1650米嘅「喜勝駒」就講明有心轉到窄場出擊，「喜勝駒」連場喺田草接近，包括上場初戴眼罩，喺1400米跑入第四名。

大摩話谷草對手級數始終較田草弱，以「喜勝駒」對上兩場輸俾「遨遊神駒」同「白鷺飛翔」，兩匹都喺田草惡氣十足，反而今場對手實力平均，但冇邊匹對手談得上有霸氣，「喜勝駒」開始成熟，而且練者同騎師郭能都認為匹馬平衡力好好，應付窄場絕唔會有問題，有力一網打盡。

上季頻頻贏馬嘅「喜」系，今季仲未有頭馬見面，練者趁季尾安排轉場，且看呢份心意可唔可以成為真實，變成頭馬。