自從馬雲話要將阿里巴巴上市，整個科技界好似開party咁興奮。馬化騰旗下騰訊（700）嘅股價更加好似火箭咁，係咁升，一班分析員為咗貼市同博取收視，輪流調高騰訊嘅目標價，高盛最新就將目標價調高至700元，全城最牛，如果到價就真係700（股價代號）見700嘞。
騰訊舊年初由250元起步，300元、400元係咁上，今年初破埋500元，噚日收報575.5元，升到冇人信。呢隻股熱成咁，負責寫佢嘅分析員冇理由唔跟足，要寫又要市場有迴響，最佳方法就係將目標價有咁高調咁高。德銀上星期將騰訊目標價調高至671元，已經最牛，高盛噚日再牛啲，估700元。

高盛睇$700　全城最牛

根據彭博資料，高盛舊年至少調整過三至四次騰訊嘅目標價，每次幅度唔算大，最明顯一次係8月調高40%至450元。但騰訊今年升破500元，佢份報告明顯out晒，眼見騰訊新高不斷，高盛索性將騰訊目標價再大幅調高。
可能高盛呢位分析員都覺得700元太高，佢同時將騰訊由「確信買入名單」剔除，即係話就算佢將騰訊目標價升到700元，都冇拍心口叫人買入。
一位有跟騰訊嘅分析員大呻，其實佢哋都好無奈，即使覺得騰訊估值好高，但行家不斷調高目標價，唔想離群惟有焗跟。除咗高盛，德銀舊年亦最少將騰訊嘅目標價調整三、四次，唔知各行分析員今年又要調整幾多次。

李華華
mailto:[email protected]