臨近年尾，有唔少勁片喺韓國上映，好似有荷李活新片《水行俠》（Aquaman）同《大黃蜂》（Bumblebee），韓片方面就有河正宇夥拍李善均主演嘅新片《轟天暴隊》、仲有宋康昊嘅《Drug King》同埋EXO成員D.O.嘅《勁舞Dancing癲》。

而根據今日韓媒報道，韓國電影觀衆佔有率喺12月創下7年來新低，由今個月1號至29號嘅韓國電影觀衆佔有率只得47.2%，即代表喺12月大部份觀眾都欣賞外國電影為主。而本月26號開畫嘅《轟天暴隊》原本一直做票房冠軍，更連續三日撼贏《水行俠》得單日票房冠軍，不過噚日《轟天暴隊》就不敵《水行俠》，當中《轟天暴隊》噚日單日有25萬名觀眾捧場，累計觀影人次為77萬，而《水行俠》噚日單日引32萬名觀眾入場，累計觀影人次約285萬名觀眾，今日《水行俠》更突破300萬人次。

不過要數年尾最勁嘅電影就非《波希米亞狂想曲：搖滾傳說》(Bohemian Rhapsody)莫屬，改編自傳奇樂隊QUEEN真人真事嘅《波希米亞狂想曲：搖滾傳說》已喺韓國上映超過一個多月，但走勢仍然強勁，截止噚日單日仍引9.5萬名觀眾入場，累計觀影人次更已破900萬，穩佔單日票房榜第四位，認真犀利。而《大黃蜂》亦於今日破100萬人次。

精選韓流，喺晒《娛果》
http://fb.com/appledailyent