【Little Englander】香港快將安全過英美加(孫柏文)
孫柏文武漢肺炎
孫柏文:英國人毫無危機感。一旦有事,只會問:「政府你點幫我?」
2月中,孫柏文見好多有得走嘅朋友,都相繼離開香港。北美、英國為主要目的地。個個諗住2020年嘅2月,就有如1941年嘅11月。再唔走,香港淪陷,想走都冇得走。
點知病毒走勢,有如水銀瀉地。遇上盲目崇拜「政府專家」、只洗手不戴罩嘅西人們,病毒喺各地都無孔不入,開始大規模社區爆發。英國為例,如無意外,本篇文章出街之時,英國病例數字將會超越香港,追意趕韓。
對上數周,我都不斷重複咁話,英國人毫無危機感。一旦有事,只會問:「政府你點幫我?」始終國民DNA,視國營醫療系統National Health Service為國家宗教。啲大主教日日透過電視話唔使驚,咁咪唔驚囉。
點唔驚法?1月中,當消息開始傳武漢爆發疫情時,除咗啲無腦年輕建制派人士外(有腦嘅年輕人點會入建制派),你報咗個去湖北嘅旅行團,相信你都會cancel啦。
不過英國人就唔同,睇呢幾日出事嘅案例,統統都係當意大利北部開始出事時,都照樣去嗰度滑雪、玩嘅人。無他嘅,book晒機票、酒店,只要英國政府冇旅遊警示,唔去就冇得退款。咁呢啲英國中產,見小朋友half term唔好嘥,咪照去囉。點知返來後,中咗招,連小朋友間學校都要即時停課,其他家長即倒瀉籮蟹搵人湊仔。
「香港人最驚死」嘅傳說,諗住喺反送中一役長埋黃土中之際,居然喺武肺呢轉火鳳凰般重生。一個瘟疫要完,傳染率R0,要跌穿1,即每個患者染到少過一個人。而「香港人最驚死」嘅後果就係香港touch wood到今日仲做到。
咁始終去到今日,嗰個五十幾歲、患有糖尿病、高血壓、操福建口音、住北角嘅大叔,見到個講普通話、唔戴口罩、亂咳嘅人,都會揼佢一鑊。R0好難唔跌。
香港人仲要唔理你啲文憑喺邊度印,你講啲嘢唔合邏輯,就插到你飛起。呢個唔係唔尊重「權威」,而係話到明係novel(新)病毒,你識嘅同我一樣,都係零。仲要廣大香港市民唔同你啲有文憑嘅專家,清楚明白大陸共產黨點樣滲透咗啲權力架構,各級政府、世衞等,全部都係腐化不堪。佢哋嘅建議,豈能視為金科玉律?
加拿大啲案例,由伊朗輸入。加拿大人問點解仲唔停啲飛機,靚仔左膠「甘地」首相杜魯多唔出聲。上個禮拜都話過左膠唔理你生死存亡,最緊要係政治正確。加拿大當然唔封關啦。
所以奉勸所有走咗嘅人,今次疫情係冇得避。最安全嘅地方,除咗氣候唔啱病毒生存嘅地方外,就係嗰啲民間危機意識達驚慌嘅地方。外國以複息咁上,香港快將安全過英美加。
最後,我住喺倫敦附近嗰間藥房,個藥劑師原來係個香港人。嗰日我白撞入去同佢傾,發現原來佢有睇我寫嘢。我問到口罩嘅問題,佢話佢就冇得賣。
原因係去到舊年年尾,批發價係5磅一盒50個。不過呢啲合歐盟規格嘅口罩,今時今日批發價已去到40磅一盒。如果賣,要賣到60磅先打和,未有得賺。不過賣到60磅一盒的話,一定俾人鬧趁火打劫。既冇錢賺,又要捱鬧,不如唔賣。
都好,等各地政府為自己嘅醫療人員留多啲口罩,未必唔係件好事。天佑英倫啊。
-----------------------
屬於香港人的移民攻略
立即登入
【全球樓行】 Dream House零距離