入圍主競賽片嘅Netflix電影《The Meyerowitz Stories》今日喺康城影展舉行首映禮，導演諾亞鮑伯（Noah Baumbach）率領一眾演員包括德斯汀荷夫曼（Dustin Hoffman）、賓史迪拿（Ben Stiller）、阿當桑迪拿（Adam Sandler）、英國女星愛瑪湯遜（Emma Thompson）出席。

今次賓史迪拿同阿當桑迪拿兩大諧星合作，同德斯汀演關係疏離嘅父子，一家人因為慶祝父親嘅藝術成就再回到紐約聚首，趁機會講出屈喺心內說話，係一部搞笑又感人嘅作品。阿當桑迪拿拍慣搞笑爛片，更多次奪得金草莓爛片之王。不過佢今次嘅演出獲外國影評人讚賞。

《Variety》影評讚揚呢次係阿當桑迪拿近15年來最好嘅角色，有望憑此角為佢獲得有生以來首次奧斯卡提名，形容佢今次少咗嬉鬧同唔正經，終於展示出自己演技實力。