一石激起千重浪。一部「寓言」電影《十年》,令大陸驚惶失措,處處加以封殺。
《十年》團隊今晚一齊出席紅地毯,談到金像獎協會主席爾冬陞已表明若以專業角度而言,《十年》奪得最佳電影機會微,就算奪獎,「都係因為社會氣氛。」單元《本地蛋》導演伍嘉良方才受訪時就謂:「其實無論藝術上抑或技術上,的確係有不足嘅。不過我哋都被提名,亦都唔係我自己去揀嘅。可能從電影角度或者藝術角度而言,令佢哋覺得有吸引嘅地方,咁可能係關於社會,關於香港,當然我哋都好尊重佢哋嘅選擇,對於主席嘅說話,我係認同同埋尊重。」
問及伍嘉良導演可擔心因為政治因素減低得獎機會?他稱:「唔擔心,我相信機制係公平嘅,評審亦有佢哋專業嘅判斷,有自由投票,亦好信任佢哋,最緊要係有『選人』同埋『被選』嘅權利。」他又稱今日踏上紅地毯感覺很怪,因為之前完全冇諗過可以入圍、入戲院,或者得到任何獎項。呢個唔係我哋開呢個project嘅計算,所有嘢都係bonus。」