當年今日

股壇瀏覽器:聯珠成交縮要小心

蘋果日報 2002/03/28 00:00


港股噚日果然被好友抽高結算,恒指重一度升破11000大關,收報10987,升200點;而即月期指重以10906結算,4月期指則升破11000,收報11049,高水62點,後市似乎仍然向好,不過黑客報料話,已有大戶趁期指抽高之際開空倉,後市喺咪真係咁好,暫時難有定論,大家唔好忘記,新一季盈富基金(2800)下周就開始發售,按慣例大市會受壓。

聯通業績唔算靚
噚日大市主要借聯通(762)業績接近預期上限而炒起兩大中資電訊股,但事實上,聯通業績唔算太理想,唯一可以值得憧憬只是母公司可能調低CDMA租網費。
聯洲珠寶(926)近排由0.11元炒上0.212元,升超過1倍,有消息話母公司聯洲國際(048)可能會出售聯洲珠寶,所以有唔少自命係春江鴨嘅炒家入市掃貨(當然亦可能係托價),不過聯洲珠寶升升吓成交好似少咗,要小心啲。此股噚日再升21.8%,收報0.212元。
Cookie話收到風民信集團(547)可能要升上0.1元以上。至於點解要炒上0.1元?民信早前宣布,投資3414萬元在上海成立合資消防系統公司,其中1854萬元以現金支付,而餘款則透過發行1560萬元新股支付,即發行1.56億股,每股作價0.1元。
冠軍科技(092)噚日通過25合1及削減股本,相信公司好快就會有配售動作。此股噚日升1.4%,報0.072元,不過公司有可能喺配售前有好消息公布。