台灣《蘋果日報》前日舉行尾禡大食會,台灣啲同事好鬼馬,請咗副總統呂秀蓮到場,真係天大面子喎。不過一睇張相,就知呢個係A貨副總統,其實係由男藝人劉爾金扮嘅,劉爾金喺台灣以反串扮演呂秀蓮做趣劇聞名,有好多粉絲。
八方唔客氣都要講句真話,A貨呂秀蓮同正版一樣咁醜樣,最似係兩個都有個血盤大口,呂秀蓮外號IBM(InternationalBigMouth),形容佢口大兼大口成日亂噏嘢,貽笑大方失禮死人。A貨呂秀蓮當日喺大食會搞氣氛,奉命玩肥佬黎一鑊。拉咗肥佬黎上台,首先恭喜肥佬黎58歲有心有力再添丁,佢自己62歲人仲「攝灶罅」,講到㷫起,更公開獻身,話要將「落紅」畀咗肥佬黎。
肥佬黎老婆聽到唔知會唔會噴血,A貨呂秀蓮即刻兜番,話只係想將自己「落落大方的口紅」獻畀肥佬,跟住就用一雙粗壯嘅手臂箍實肥佬,用佢個IBM大大力嘴落肥佬黎塊面度。肥佬黎唔為意被偷襲,俾IBM啜到實郁都冇得郁,塊面仲留底咗個血紅色嘅唇印。肥佬黎都有今日咯。