韓國大熱綜藝節目《一日三餐》下個月11號會播出呢一季最尾一集，而噚日播出嘅一集中節目組就再次邀請朴信惠嚟擔任嘉賓，而今次亦喺朴信惠繼今年《一日三餐─旌善篇》中喺玉筍峰「三餐房子」嘅第一位客人後，再次作為「三餐房子」嘅最後一位客人，朴信惠將會出演噚日一集及下周五一集。

由於上次朴信惠上節目時盡顯佢賢良淑德嘅一面，即時吸納咗唔少粉絲，就連主持之一嘅澤演都表現得好冧佢，當朴信惠一出現時，三位主持澤演、李瑞鎮同金光奎即刻起身歡迎佢，朴信惠即笑晒話：「今次我唔係做嘢，只係嚟玩。」

不過朴信惠想玩嘅心態好快就被打消了，因為朴信惠都會忍唔住落手落腳一齊做，所以最終都冇得只係玩唔做嘢。而朴信惠同澤演都有唔少互動，兩人戴上草帽仲好得合襯，好似一對農作夫婦一樣，認真sweet爆。

而喺《一日三餐》中同樣受歡迎嘅兩隻萌犬Sappy和Eddy，朴信惠見到佢哋時都愛不釋手，係咁同佢哋玩，佢同澤演連同兩隻萌犬一齊時，成個畫面似足一家四口呢。至於兩隻萌犬比起之前大咗唔少，但佢哋依然可愛，啲網民粉絲喺官方Facebook見到佢哋後都即刻留言話：「好可愛」、「可以領養嗎」、「因為你哋先睇節目呢」、「想去旌善探你哋」。