飲食人誌:
沙田打吡日 怕辣阿柴整招牌咖喱

蘋果日報 2003/03/14 00:00


由三月底開始,將會有多場大型賽馬賽事要舉行。自三月二十三日那天的沙田打吡日開始,馬場內的美食櫃位和場畔小食亭,便會推出一系列平價的正宗泰國菜式,負責為解決一眾馬迷醫肚重任的工作,便落入今天的主角阿柴身上。

記者:謝翠玲 攝影:陳盛臣

大中小辣都係$26
泰式紅咖喱雞飯
自己調製咖喱醬大辣
阿柴話:呢個紅咖喱係照正宗家鄉風味嚟做,係自己調配炒製嘅秘製紅咖喱醬,再配上車厘茄、泰國圓茄、卡菲爾青檸葉,羅勒香葉同其他配料做成。用雞肉同甜竹笋配合嚟煮,可減低辣味。不過呢個菜我自己都唔係好食到,因為我唔慣食太辣,哈哈哈!

記者試食:做定心理準備,以為一定會辣得很厲害,但可能因為我已放了一會才去試吃,辣味也就不那麼難受。如果想試食這個又怕太辣,就放涼一會再吃吧!
阿柴呢個名初初聽到有啲搞笑,但原來沙田上上下下的人都是這樣稱呼他的,因為他身形粗獷膚色深,而且阿柴跟他的泰國名字發音有點似,所以便有這個名了,但訪問過程中最搞嘢嘅,都係發覺阿柴原來唔係好食得辣,但佢所煮嘅泰菜就辣到小記飛起!
阿柴小檔案
*阿柴,全名ApichartMunbupachart,42歲,中泰混血兒;

*入廚逾十五年,歷任曼谷及香港多間五星及六星級大酒店的東南亞大廚,擅長主理泰國菜;

*現為沙田馬場「好賞食」東南亞美食首席廚師。
飲食世家連太太都係廚師
好好笑容的阿柴,總是給人很開心的感覺。由他一出世開始,阿柴便注定要跟食物扯上關係吧!因為阿柴的中國人爸爸開舖賣泰式及中式糖水,媽媽炒貴刁,他十歲便開始要幫媽媽手,到阿柴長大後,跟妹妹一同來了香港工作,妹妹現在於香港開泰式香料舖,而阿柴又娶了個同樣做廚師的太太,絕對稱得上是飲食世家。
夫妻放工後最愛鑽研香料
由於阿柴太太愛姐(這是阿柴替太太取的中文名)同樣是泰國菜廚師,所以兩夫婦平日最鍾意做的活動之一,就是在收工後鍾意喺屋企晚晚鑽研香料配搭。鑽研,好認真的詞語,問他們會不會一言不合便發生摩擦?為了一條香料而失感情。阿柴又笑得好燦爛:「唔會呀!佢做嘅風格跟我唔一樣,佢比較偏向傳統口味,我嘅就會加一啲變化創新一啲,大家都唔同嘅!」原來如此,不過我想愛姐見到如此好笑容的阿柴,應該都好難發火吧!
唔做酒店揀馬場鍾意菜式多人食
阿柴未到馬場做之前,是在大酒店做廚的,但點解好好的有酒店大廚不做,而要到時間匆忙而需求量大的馬場美食廣場做主廚呢?原來阿柴正是鍾意馬場夠人多,可以有更多人品嘗到他的食物。不怕辛苦嗎?不怕不怕,阿柴拍拍心口,頂得順,果真敬業樂業。
馬散麻咖喱豬肉飯
印式南泰菜好香濃中辣
阿柴話: 呢個馬散麻(Massaman)咖喱,唔係太多地方可以食到,呢個係南泰地方嘅特色咖喱,嗰度比較受到印度食物嘅影響,所以我加咗印度咖喱粉同蒜茸嚟煮,味道香濃,我最鍾意呢個菜,因為唔太辣!

記者試食: 我都鍾意呢個馬散麻咖喱,那陣咖喱味不太辣但香濃,特別是完全燜至入味的薯仔,又腍又惹味,用來拌飯吃最正!
泰式青咖喱飯
勁落香草蓋過咖喱香小辣
阿柴話: 呢個係最唔辣嘅咖喱,我自製嘅青咖喱醬以香味為主,辣味反而唔太重要,所以加咗比較多嘅香草嚟煮成,其實唔配魚配其他肉類都好好味,但係揀海鮮類嘅炸魚,味道會比較清新。

記者試食: 真係完全唔辣,有一陣陣香味,都幾難分出有哪幾種香料!那塊魚要完全浸入咖喱中一會才會較入味。
泰式套餐$39
牛柳沙律好開胃大廚推介
套餐解構: 呢個套餐有一大碗以多種泰國原產香料,如南薑、檸檬香茅等,跟蝦殼熬製湯底的冬蔭功湯,再加上一碟辣燒牛柳,配以酸辣味道的泰式醬汁和蔬菜來配白飯,還有經阿柴精心改良過的糯米飯甜品作完結。

記者試食: 呢個套餐好大份,我就一定食唔晒!那個辣燒牛柳沙律,味道都幾酸,食得酸的人吃就會覺得開胃,而那椰汁糯米飯在加入了馬蹄之後,口感和味道也變得不太滯。
沙田馬場「好賞食」
電話:1817(賽馬會服務熱線)
入場費:$10?位
營業時間:開賽前12小時至尾場完畢(沙田賽事);開賽前1小時至尾場完畢(非沙田賽事)