周柏豪今日去到商台錄廣播劇《歐陽志強》，過埋今個禮拜就跟華納唱片結束10年賓主關係，對此柏豪都有點不捨感覺，而下半年會重新開始錄歌工作，至於去向則稍後公布。對於同門師妹連詩雅遭華納入稟控其經理人公司違反兩份協議而追討賠償，柏豪指一直知道此事，但因進入法律程序而不便多談。

問到佢份合約有無灰色地帶？佢話：「每份合約都有灰色地帶，我講我自己，我係尊重合約，亦希望人哋尊重我，如果人哋唔尊重我，我會拎合約出來睇番字眼尋求公平，想做到合約上、道德上、人格上、商業上都問心無愧。」

柏豪話近排忙於電影謝票，佢覺得令入座率提高係好事，以佢估計票房應該達700萬，距離蔡卓妍定下嘅1,000萬票房應該冇問題，過千萬咪要守承諾扮AV男？柏豪笑住話：「真係要㗎，咁要買番件格仔衫，我自己覺得同AV男及澳洲模特兒都唔似樣。」網絡發達，柏豪覺得好容易便找到撞樣嘅人，佢笑指若果找到同自己一樣樣嘅人都好，可以找對方當替身讓自己休息。