太古地產(1972)旗下金鐘太古廣場寫字樓最近多咗個有名租客，呢個租客應該可以吸引好多富貴人家走去行番轉㖭，講緊嘅係養和醫健專科中心，呢個中心明年仲會提供整形外科與醫學美容服務㖭喎。

唔少有錢人有乜頭暈身㷫，都會走去養和醫院，如果唔想走去跑馬地，中環、西區同太古城亦有養和醫健，可以睇到個別專科。新近養和醫健就喺太古廣場1期寫字樓，租落21至23樓共兩層半樓面，合共5.1萬平方呎做專科中心。

華華今日下晝走上去八卦，只得22樓嘅牙科開診(9月中開業)，其他專科好似眼科、內視鏡檢查、皮膚，仲有整形外科都未開業，裝修緊。聞說，下一個開業嘅專科應該係眼科，預計明年初開始提供服務，整形外科要去到明年中先開業。

養和與太地當然唔肯透露呢兩層半幾錢租，太古廣場1期屬於甲級寫字樓，以市值呎租100蚊粗略計算，月租至少500萬元。不過唔講其他專科，淨係講醫學美容，佢哋應該都有大把生意喇。

掌握財經生活資訊，即Like「蘋果ATM」fb專頁啦！
http://fb.com/appledailyatm