亞視拖咗差不多一個月，今日終於發放9月份薪金！而今日20位亞洲小姐亦去到亞視大埔總台參加《ATV2014亞洲小姐大中華總決賽》Catwalk排練探班，不過唔知係咪銀根短缺，一眾佳麗竟然有傳媒在場都只係淡妝上陣，3號吳美婷的深黑熊貓眼、19號邱珈蓉頭髮亂了，還有9號韓非兒束「阿婆髻」，個個十足十剛起身嘅樣，驚嚇度爆燈。

問到亞視公關經理黃守東(Jeff)點解要佳麗自行化妝同整頭，係咪因為冇錢？佢就解釋﹕「因為今日係普通基本綵排，所以由佢哋自己化淡妝。」

今日AliceB.擔任儀態導師，4號陳沛鈺、6號劉佩欣、8號張軼珺同17號寧潔琼上圍凸出，行Catwalk時身材盪漾搶盡風頭。大會又安排蛋糕送俾噚日26歲生日嘅20號唐淑薇，問到生日願望？佢話﹕「希望喺比賽當中攞多啲經驗，覺得自己未來，緊要過攞冠軍。」

亞視助理副總裁趙汝強今日就透露亞視員工已收到9月份糧，仲話計劃補回利息；而10月份糧亦已積極安排中，佢話﹕「已同董事局、股東及投資者傾緊，希望如期出糧。」有指筱靜因講過「出糧天經地義」被亞視雪藏，Jeff就否認傳聞，不過就承認筱靜原本主持嘅《星動亞洲》會經常轉人。

而《亞姐大中華總決賽》將於26號晚於大埔總台進行錄影，霍震霆、羅霖和冼國林會擔任評判，當晚選出的10位佳麗將於稍後聯同其他亞洲地區佳麗再有一場總決賽，到時三甲才會誕生，而28號就會播出。