晉佳上個禮拜係咁易講過可以買乜嘢板塊嘅股份，除咗內房、保險、越南概念之外，當然其他板塊都有唔錯嘅選擇，可以慢慢逐隻講，其中，消費股按理都唔會跑輸大市，而亨得利（3389）喺上星期五跌市之中，調整唔深，股價兩蚊夠硬淨，嚟緊後市應該有得升。
市場對於亨得利都頗多投訴，包括股東Swatch可能減持、同店銷售增長放緩、成本增加等等。就係因為咁，亨得利作為一隻內需股，市盈率只得9.6倍，計埋換股債攤薄效應，市盈率仍然唔夠11倍。
之前亨得利管理層講過，今年首4個月同店銷售增長係一個好低嘅水平。德銀就預計，亨得利今年上半年同店銷售增長只有5%左右，銷售額增長得一成，除息、稅前盈利（EBIT）有可能按年下跌2%，而亨得利盈利出現倒退已經係市場預期之內。
亨得利近年繼續積極擴充，市場就怕銷售開支增加，令成本出現沉重壓力。睇番公司舊年銷售額同銷售開支升幅同步，仲未有異樣，至於今年成本升幅會唔會惡化，遠遠超過收入升幅，相信會成為8月21日公佈中期業績嘅焦點所在。長線嚟講，今次業績頗值得留意。
相比金融海嘯之前，其實亨得利嘅財政狀況已經改善咗好多，主要係因為前後發過兩大筆換股債，加埋接近40億元，部份已經轉換成股份。目前，亨得利淨負債只有3.5億元人民幣左右，未來仲會有正數經營現金流幫補吓，所以預計財政狀況應該會保持健全。

睇番上星期內地公佈嘅進出口數據，表現咁差，拖累恒指回吐過百點一啲都唔出奇。亨得利主要業務係進口名錶，再喺內地進行分銷，中國進口數據差，反映需求不濟，對亨得利業務不利，不過，股價上星期五依然硬淨，冇升跌，表現算係相當唔錯。
亨得利自從6月開始，陸續有進行股份回購，加上Swatch重申無意減持股份，股價就喺兩蚊築底，現價買入多少都揸得放心啲。除非嚟緊公佈嘅中期業績太樣衰，否則股價可以企穩2蚊樓上。至於短線，可以趁近排股價硬淨，先買半注，睇2.50元；如果業績理想，先再加注中線持有。

晉佳
本欄逢周一、三及五刊出