靚仔又叻仔嘅金融才俊，睇嚟好快又多一位，皆因藝人謝霆鋒由影圈跳入財金圈嘅計劃噚日終於有眉目。根據港交所（388）披露，霆鋒上星期三喺場外以1.2億元，買入3.5億股漢傳媒（491），等於持有呢間公司23.42%，成為單一大股東，孖屐一直盛傳佢有意將一手創立嘅電影後期製作公司「Po朝霆」借殼上市，似係好事近。
17歲已經出道嘅霆鋒，2003年唔聲唔聲創立「Po朝霆」，據講，𠵱家每年淨賺一億，營業產值高達60億元，一度震驚娛樂同財經界。雖則佢講過冇考慮將「Po朝霆」上市，但今年7月「Po朝霆」結盟香港資源（2882）時，借殼傳聞已經一街飛。

藝人做老闆　股價唔多掂

霆鋒以0.35元入股，比較股份上星期四停牌前報0.38元，折讓近8%。查實漢傳媒上星期四停牌前已經公佈，以75萬元代價出售旗下經理人同音樂製作發行業務所有權益，殼味非常濃厚，之前嘅大股東就包括有英皇老闆楊受成，玄機更多。
之前都有導演、藝人榮升上市公司老闆，但暫時冇乜邊隻好有成績。好似「星爺」周星馳3、4年前借殼比高（8220）上市，投資者初期都有啲興奮，可惜興趣短暫，當時折合計一度炒上近8毫子，家陣只得3毫；至於前身東方魅力嘅星美國際（198）更令譚詠麟同陳百祥一眾藝人損手。唔知霆鋒可否打破宿命嘞。

李華華
mailto:[email protected]