曼聯暫時官方只係簽咗域陀連迪洛夫一個人，但近幾個月曼聯嘅轉會傳聞滿天飛，每個位置都傳過要增兵，傳過嘅球員數以十計，係差在未傳過有新教練嚟頂摩連奴嗰位喳。唔少網民都話，夏天英超唞暑，唔少小編都係靠曼聯嘅轉會傳聞嚟養妻活兒。有外國網民搜集咗近一兩個月同曼聯傳過緋聞嘅球員，之後排咗個最強4-4-2正選出嚟。

門將係喺U21歐國盃開始露底嘅「新保方」基安盧基當拿隆馬，呢位意國小將話要走人，唔同AC米蘭續約，經理人仲係近年同紅魔成日有生意來往嘅拉奧拿，佢自然曾經同曼聯拉上關係。後防方面，右閘係摩納哥嘅法賓奴泰華利斯，雖然佢已經改踢防中，但因為今夏同曼聯傳過嘅防中實在太多，中場冇位，只好委屈佢打番右閘。中堅方面，成日傳曼聯話要回購米克堅尼，同埋佢哋對熱刺嘅艾歷迪亞好有興趣，呢兩名英格蘭球員就合作扼守中路啦；左閘方面係熱刺嘅丹尼路斯。

中場方面，有呢排傳到最似層層嘅尼曼查馬迪，佢嘅拍檔係羅馬中場尼恩高蘭。至於左右兩翼，當然有成日借曼聯過橋去迫皇家馬德里加人工嘅基斯坦奴朗拿度，另一邊亦係皇馬人，就係被皇馬打入冷宮、傳來傳去都未走到嘅占士洛迪古斯。其實踢4-4-2陣式係唔能夠將呢班同曼聯傳過緋聞嘅球員發揮至強威力，因為喺曼聯緋聞球員名單中，最人才濟濟嘅係前鋒。可以話，除咗美斯之外，每個球壇頂級前鋒都同曼聯拉上關係，調轉嚟講，冇同曼聯傳過緋聞，都唔好意思話自己係頂級球員啦。近幾個月，傳過曼聯想買嘅前鋒有基沙文、艾華路莫拉達、盧卡古、比洛迪、基利安麥巴比、迪亞高哥斯達、哈利卡尼、羅拔利雲度夫斯基等。外國網民就揀咗傳得最行嘅基沙文同莫拉達入最強11人。