我們都在尋找，那顆消失的心（結局）｜有心無默
蘋果日報 2018/06/01 18:00
有心無默地區消息蘋地
有一段好長嘅時間，我一直喺度追尋緊一個答案。
仲記得，當我喺漆黑中甦醒過嚟，第一下感覺到嘅，係有人捉住我隻手。
「尋芯？」我喺朦朧間近乎無意識咁講出一個人名。下一秒，手嘅主人即刻有反應。
「細佬，你終於醒啦！」一把女聲激動咁講：「阿晨……佢醒喇，幫我嗌醫生嚟！」
「妳撳病床隔離個掣就得。」男聲回應：「喂兄弟，你記住你應承過會做我伴郎㗎，支持住。」
雖然出盡力氣都擘唔大雙眼，但我認得出呢兩把聲。
「家姐，阿晨……係唔係你哋？」我虛弱咁講，口乾到就好似就要裂開咁。
「係呀！細佬，你傷口仲痛唔痛？你仲記唔記得自己點樣受傷？你肚唔肚餓？你雙眼係咪都傷咗所以擘唔開？」家姐開始起勢咁提問。
「大家姐，妳唔好一輪嘴咁問喇，等佢精神返啲先……醫生到喇。」
醫生嚟到後，佢哋三個開始講埋啲我大腦完全處理唔到嘅說話。大部份都係事後精神狀態好啲先理解清楚──譬如，我中刀之後，好快就有途人發現到我然後Call白車、好彩刀插得唔深又傷唔到內臟所以冇生命危險、手術後我足足瞓咗一整日、因為驚傷口可能受感染，所以醫生建議我喺醫院休息多三日……
而話咁快就過咗兩日半。雖然呢段日子我幾乎長時間都係喺病床上面瞓覺休養，但每當清醒嘅時候，我都會忍唔住諗返起嗰一晚，諗返起佢。
出院當日嘅晏晝，因為家姐要開工，所以佢拜託阿晨過嚟陪我出院。
「克仔，我知道醫院冇啖好食㗎喇，所以專程買外賣畀你食……係元朗最出名嘅沙嗲牛通。」
「嘩，多謝晒。」我感激咁接過阿晨嘅外賣，「真係隔住膠袋都聞到陣香味。」
「趁熱食喇。」佢坐埋我側邊，語氣輕鬆咁問：「係嘞，係咪已經有警察嚟搵你落過口供？」
「嗯。」我點頭，打開碗沙嗲牛肉通粉後即刻狼吞虎嚥起嚟。
「咁你……諗唔諗得返個兇手邊個？」
一聽完，我即刻停低手，然後搖頭講：「我醒唔起……當時情況實在發生得太突然，我都未睇清楚就中刀，下一秒對方就已經轉身跑走咗。」
雖然我落口供都係咁講，但事實係點，我梗係記得一清二楚，亦冇忘記到落手嘅人係邊個。我之所以講大話，係因為我覺得呢件事並唔係咁簡單。
至少，我真心相信……尋芯咁做係有苦衷。
「唉。」阿晨聽完嘆咗口氣，「克仔，識咗你咁耐，唔係以為我睇唔穿你嘛？」
「阿晨……」我好意外，「其實……」
「得喇。」佢伸手打斷咗我，然後笑住拍一拍我膊頭，「一場兄弟，我當然知道你係有難言之隱。我唔係想知道個真相，我只係想同你講……假如你真係遇到咩困難，記住背後永遠有我呢個兄弟撐你。」
「好兄弟，」我聽完當然感動，「最衰傷咗，唔係我一定攬實你……」
「留返結婚嗰日先盡情攬喇。」阿晨無奈咁講：「你快快脆食完然後搞出院手術，等我車你返屋企啦。」
「收到。」
點解我會相信尋芯有苦衷？最大嘅證據，就係我仍然在生呢個「事實」。假如佢嗰陣真係想殺死我去徹底擺脫詛咒，咁呢一刀就唔會係插落腹部，而係心臟位置。
睇到呢度你可能會質疑，可能係佢太驚太緊張所以失手呢──呢個當然係一個說法，但點解佢要揀個隨時都會有人發現到嘅位置落手呢？真係想我死，應該帶我去啲偏僻啲嘅地方先係……
而最大嘅疑點，其實係我落口供嘅時候注意到。當時，我家姐突然問嗰位女警知唔知係邊個人幫我Call白車，女警聽完即刻臉色一沉，考慮咗幾秒先開口講：「唔怕老實同你哋講，其實我哋都仲查緊。」
「吓？」家姐聽完皺起眉：「點解要查？佢唔係目擊者咩？」
「總之件事就有少少……詭異。我哋唔單止搵唔到電話記錄，問返當日聽電話嘅同事，佢竟然連對方係男定女都唔記得。然後我哋試過去睇案發現場附近嘅閉路電視，發現當時根本就冇人打電話……」
「點解會咁……」「我哋都想知。」
雖然喺其他人眼中呢個情況詭異到得人驚，但我就完全明白發生緊咩事──只有受「詛咒」影響嘅人先可以產生到呢種連鎖效應。而呢個人，假如唔係我嘅話，就只可能係尋芯。
呢個就係第二個「事實」──尋芯當日唔單止冇擺脫詛咒，仲重新進入「消失」狀態。而我就正好相反，自從受咗嗰一刀之後，我就再冇消失過。
其實諗到呢度，我好似已經估到成件事係點。但如果冇機會親耳聽到尋芯嘅版本，呢個就永遠都只會係我嘅「想像」同「期望」。
為咗搵到答案。自我康復以嚟，我幾乎每晚都會去返我同尋芯第一次相遇嘅地點，然後每次都係失望而回。
我有試過打電話畀小絲，最後發現原來佢早已經封鎖咗我。
我有試過返去景華酒店等阿暪出現，但始終都係等唔到。
連最大嘅希望──尋芯老豆，亦都唔再住喺本來嗰一間醫院。
終於，我只可以承認另一個「事實」──我再搵唔到尋芯了。
有心想避開一個人本來就唔係一件難事。一個會「消失」嘅人，某程度上就更加方便。
可能起初真係受盡挫折，但隨住時間過去，我都好似開始慢慢習慣呢種痛。
雖然話係習慣，但痛楚，就從來都冇消失過。
距離嗰日不知不覺又過咗兩個月。呢晚我又如常去到海旁，其實本身都預咗唔會等到啲咩。點知逗留咗半個鐘之後，背後突然有人開聲同我講嘢。
「你點解始終都唔肯放棄？」
我即刻擰轉身，雖然出現嘅人唔係尋芯，但我彷彿可以見到一絲曙光。
「小絲……」我盡量保持冷靜，問：「係唔係尋芯叫妳嚟？」
「係。」小絲毫不猶豫咁回答：「尋芯走之前拜託我定時嚟呢度睇下。假如兩個月後你仲係堅持嚟呢度……就將佢留低嘅訊息交畀你。」
講到呢度，佢拎起自己部手機撳起上嚟。唔使幾秒，我就收到六條語音訊息，但我冇即刻打開嚟聽，而係追問小絲：「妳話尋芯走之前……走係咩意思？唔通佢……」
「我要講嘅嘢就係咁多。」佢打斷咗我，「其餘嘅嘢你就自己聽訊息。雖然我冇聽過，但以我認識嘅尋芯，佢一定會將所有答案放晒喺裡面……咁我走喇，你自便。」
「咪住，妳唔一齊聽？」
「我應承過尋芯唔會聽就唔會聽。」小絲講完後擰轉身，然而行咗幾步又回頭，抱住最大嘅覺悟講：「其實……我曾經有一刻諗過唔照尋芯嘅意思做，由得你繼續慢慢等落去。但我最後都冇咁做，因為我好珍惜同尋芯嘅友誼……我希望，你都可以搵到自己最珍惜嘅嘢。」
等到小絲離開咗之後，我先行去一個人少、較清靜嘅地方，鼓起最大嘅勇氣播放第一條語音短訊。
「阿克。」就喺下一秒，一把熟悉嘅聲音響起，「我諗，當你聽到呢段訊息嘅時候，我應該已經去咗好遠嘅地方。放心，我冇死到。自從你嗰晚救返我之後，我就同自己發過誓，唔會再尋死……」
聽到呢度我當堂鬆一口氣，然後無奈一笑。都唔知佢哋係咪故意想嚇我，先用啲咁易令人誤會嘅開場白。
「……我只係離開咗香港。呢段訊息係我嚟到德國第二日嘅時候錄低，但到你聽嗰陣我應該已經去咗第二個國家喇。講個秘密你知呀，其實自從受到詛咒之後，我就一直冇坐過飛機。估唔到第一次坐，就係以『消失』嘅狀態，仲要係去到機場先隨便揀個地方飛……感覺就好似突然變咗有錢人咁。」
「直到飛機起飛之後，我終於開始識得驚。驚可能會突然搵到碎片恢復狀態，但結果又咩事都冇，成程機我就好似空姐咁不停行嚟行去，感覺真係好新鮮、好奇妙。唔……聽到呢度你可能會擔心我一個人去外國掂唔掂。放心喇，我英語不知幾好。而且，只要維持住『消失』狀態，食同住根本就唔成問題。」
第一段訊息就喺度結束。之後嘅四段尋芯都係講下自己嘅「旅遊」經歷，而每段佢錄嘅時候都係身處喺唔同國家──西班牙、意大利、荷蘭、挪威……唔知點解，聽聽下我個心居然唔再覺痛，仲忍唔住羨慕起佢上嚟。
終於，去到最後一段了。
「阿克，如無意外，呢段應該係我錄畀你嘅最後一段錄音。雖然前排真係玩得好盡興，但我冇忘記到自己嚟呢度嘅目的。第一件事，係搵返當年將詛咒傳畀阿暪嘅人。我唔奢望咁做就可以解除詛咒，但唔試就永遠都唔會知道結果……而第二件事，我諗你應該都好清楚。」
我當然清楚了，只係一直苦等妳嘅「答案」。
「……我唔想再傷害到你。而唯一可以做嘅，就係離開。」
尋芯嘅沙啞聲線，令我有種強烈感覺，佢應該係重複錄過呢段好多次，為咗唔想畀我知道佢曾經喊過。
「嗰晚，我之所以用刀傷你，係因為只有呢個程度嘅傷害先可以令你質疑我哋之間嘅感情……就算只係一瞬間就已經足夠。果然，你中刀之後就即刻解除咗狀態……」
「咁係因為，」我忍唔住開聲講，就算明知佢冇可能聽到，「嗰陣妳留低咗『碎片』……」
當時，代表住悲傷同離別嘅碎片，伴隨住佢嘅眼淚，令我恢復狀態。
「雖然一切仲未算遲，但如果我唔盡快離開，中斷同你嘅連繫……最後結果都係會一樣。嗰陣小絲極力反對，但我最後都說服到佢；至於阿爸，佢最後都明白咗我嘅苦衷。」
「阿克，其實我仲有好多嘢想同你講，但再講就永遠都講唔完……我要學識放手，你都係一樣。我希望最後呢十秒，除咗代表住短信嘅結束，亦係代表我哋故事嘅結束……」
「阿克，如果你真係鍾意過我……就忘記我喇。」
「拜拜喇……仲有……對唔住。」
*
*
*
半年後，某時某地。
「如果，真係咁樣完結，咁我哋嘅結束又代表住啲咩？」
「阿克！？點解你會搵到……」尋芯見到我嗰刻當然好意外。
「尋芯，妳聽我講埋先。嗰晚聽晒所有訊息之後，我真係喊咗好耐。但喊完之後，我諗返起伯父曾經要我應承佢──若果有一日妳消失咗，我一定要搵返妳，然後……」我走上前緊緊握住尋芯隻手，「……唔會再放手。」
「估唔到阿爸居然要你……但你唔怕個詛咒又會……」
「我有個諗法，到而家都仍然堅信係冇錯。」我握住尋芯隻手行到去湖邊，「記唔記得當日我消失嘅時候，妳仲係可以見到我？就正如妳消失嘅時候我見到妳咁。」
「嗯……」
「或者，我哋係命中注定要做對方嘅另一半。」我好直接咁講：「就算最後真係解除唔到詛咒，最壞嘅情況都係喺我哋之間傳嚟傳去。但只要我哋身邊仲有對方，其實呢件事又有咩咁得人驚？」
「你咁講……又好似有道理……」雖然同意，但下一秒尋芯又變得疑惑起嚟，甚至試圖甩開我隻手，「阿克……我開始驚，驚所有嘢都係一場夢。你點可能會搵到我？根本就冇可能……唔通……係小絲？」
「冇錯。」我點頭，「就好似妳當初說服佢咁，我最後都說服到佢話畀我知妳身處喺邊個國家同城市。但一個地方咁大，要搵到妳其實真係花咗我好長時間。」
距離第一日出發，其實已經過咗五個月。
時間、金錢、工作──可能我係犧牲咗好多嘢先可以展開呢段旅程。但如果冇犧牲，又點會識得珍惜？
「阿克，但你嘅諗法都未必係絕對，或者終有一日……」
「咁我哋就係呢一日嚟之前，好好珍惜同享受呢段日子。」
講到呢度，我慢慢將臉湊向尋芯。可能佢有一秒猶豫過，但最後都係接受咗我嘅心意。
消失的心，對尋芯嚟講係代表住碎片；對我嚟講，就係一位珍惜嘅愛人。
一吻之後，我喺佢耳邊低聲講：「尋芯，我愛妳。」
「我一直……都等緊呢句說話。」
我同尋芯嘅故事結局會係點，喺呢刻的確係未知數。但至少，我哋都深信，接住落嚟呢段日子，肯定係我哋人生最快樂嘅時光。
（全文完）
我們都在尋找，那顆消失的心（一）
https://hk.news.appledaily.com/district/realtime/article/20180314/57941975
我們都在尋找，那顆消失的心（二）
https://hk.news.appledaily.com/district/realtime/article/20180324/57988829
我們都在尋找，那顆消失的心（三）
https://hk.news.appledaily.com/district/realtime/article/20180330/58002020
我們都在尋找，那顆消失的心（四）
https://hk.news.appledaily.com/district/realtime/article/20180406/58033536
我們都在尋找，那顆消失的心（五）
https://hk.news.appledaily.com/district/realtime/article/20180413/58056545
我們都在尋找，那顆消失的心（六）
https://hk.news.appledaily.com/district/realtime/article/20180420/58093001
我們都在尋找，那顆消失的心（七）
https://hk.news.appledaily.com/district/realtime/article/20180427/58116202
我們都在尋找，那顆消失的心（八）
https://hk.news.appledaily.com/district/realtime/article/20180504/58141184
我們都在尋找，那顆消失的心（九）
https://hk.news.appledaily.com/district/realtime/article/20180511/58175243
我們都在尋找，那顆消失的心（十）
https://hk.news.appledaily.com/district/realtime/article/20180518/58201203
我們都在尋找，那顆消失的心（十一）
https://hk.news.appledaily.com/district/realtime/article/20180525/58230656
專欄作者簡介：
有心無默
網絡作家，以創作為樂。真實身份為故事星人。著有《西營盤》、《絕命上映》、《絕望走廊》等暢銷小說。
Facebook專頁：
https://www.facebook.com/Echo.of.Heart/
發掘更多身邊的小城故事，請LIKE 蘋地Facebook Page，並設定為「搶先看」： https://www.facebook.com/appledailyland/
仲記得，當我喺漆黑中甦醒過嚟，第一下感覺到嘅，係有人捉住我隻手。
「尋芯？」我喺朦朧間近乎無意識咁講出一個人名。下一秒，手嘅主人即刻有反應。
「細佬，你終於醒啦！」一把女聲激動咁講：「阿晨……佢醒喇，幫我嗌醫生嚟！」
「妳撳病床隔離個掣就得。」男聲回應：「喂兄弟，你記住你應承過會做我伴郎㗎，支持住。」
雖然出盡力氣都擘唔大雙眼，但我認得出呢兩把聲。
「家姐，阿晨……係唔係你哋？」我虛弱咁講，口乾到就好似就要裂開咁。
「係呀！細佬，你傷口仲痛唔痛？你仲記唔記得自己點樣受傷？你肚唔肚餓？你雙眼係咪都傷咗所以擘唔開？」家姐開始起勢咁提問。
「大家姐，妳唔好一輪嘴咁問喇，等佢精神返啲先……醫生到喇。」
醫生嚟到後，佢哋三個開始講埋啲我大腦完全處理唔到嘅說話。大部份都係事後精神狀態好啲先理解清楚──譬如，我中刀之後，好快就有途人發現到我然後Call白車、好彩刀插得唔深又傷唔到內臟所以冇生命危險、手術後我足足瞓咗一整日、因為驚傷口可能受感染，所以醫生建議我喺醫院休息多三日……
而話咁快就過咗兩日半。雖然呢段日子我幾乎長時間都係喺病床上面瞓覺休養，但每當清醒嘅時候，我都會忍唔住諗返起嗰一晚，諗返起佢。
出院當日嘅晏晝，因為家姐要開工，所以佢拜託阿晨過嚟陪我出院。
「克仔，我知道醫院冇啖好食㗎喇，所以專程買外賣畀你食……係元朗最出名嘅沙嗲牛通。」
「嘩，多謝晒。」我感激咁接過阿晨嘅外賣，「真係隔住膠袋都聞到陣香味。」
「趁熱食喇。」佢坐埋我側邊，語氣輕鬆咁問：「係嘞，係咪已經有警察嚟搵你落過口供？」
「嗯。」我點頭，打開碗沙嗲牛肉通粉後即刻狼吞虎嚥起嚟。
「咁你……諗唔諗得返個兇手邊個？」
一聽完，我即刻停低手，然後搖頭講：「我醒唔起……當時情況實在發生得太突然，我都未睇清楚就中刀，下一秒對方就已經轉身跑走咗。」
雖然我落口供都係咁講，但事實係點，我梗係記得一清二楚，亦冇忘記到落手嘅人係邊個。我之所以講大話，係因為我覺得呢件事並唔係咁簡單。
至少，我真心相信……尋芯咁做係有苦衷。
「唉。」阿晨聽完嘆咗口氣，「克仔，識咗你咁耐，唔係以為我睇唔穿你嘛？」
「阿晨……」我好意外，「其實……」
「得喇。」佢伸手打斷咗我，然後笑住拍一拍我膊頭，「一場兄弟，我當然知道你係有難言之隱。我唔係想知道個真相，我只係想同你講……假如你真係遇到咩困難，記住背後永遠有我呢個兄弟撐你。」
「好兄弟，」我聽完當然感動，「最衰傷咗，唔係我一定攬實你……」
「留返結婚嗰日先盡情攬喇。」阿晨無奈咁講：「你快快脆食完然後搞出院手術，等我車你返屋企啦。」
「收到。」
點解我會相信尋芯有苦衷？最大嘅證據，就係我仍然在生呢個「事實」。假如佢嗰陣真係想殺死我去徹底擺脫詛咒，咁呢一刀就唔會係插落腹部，而係心臟位置。
睇到呢度你可能會質疑，可能係佢太驚太緊張所以失手呢──呢個當然係一個說法，但點解佢要揀個隨時都會有人發現到嘅位置落手呢？真係想我死，應該帶我去啲偏僻啲嘅地方先係……
而最大嘅疑點，其實係我落口供嘅時候注意到。當時，我家姐突然問嗰位女警知唔知係邊個人幫我Call白車，女警聽完即刻臉色一沉，考慮咗幾秒先開口講：「唔怕老實同你哋講，其實我哋都仲查緊。」
「吓？」家姐聽完皺起眉：「點解要查？佢唔係目擊者咩？」
「總之件事就有少少……詭異。我哋唔單止搵唔到電話記錄，問返當日聽電話嘅同事，佢竟然連對方係男定女都唔記得。然後我哋試過去睇案發現場附近嘅閉路電視，發現當時根本就冇人打電話……」
「點解會咁……」「我哋都想知。」
雖然喺其他人眼中呢個情況詭異到得人驚，但我就完全明白發生緊咩事──只有受「詛咒」影響嘅人先可以產生到呢種連鎖效應。而呢個人，假如唔係我嘅話，就只可能係尋芯。
呢個就係第二個「事實」──尋芯當日唔單止冇擺脫詛咒，仲重新進入「消失」狀態。而我就正好相反，自從受咗嗰一刀之後，我就再冇消失過。
其實諗到呢度，我好似已經估到成件事係點。但如果冇機會親耳聽到尋芯嘅版本，呢個就永遠都只會係我嘅「想像」同「期望」。
為咗搵到答案。自我康復以嚟，我幾乎每晚都會去返我同尋芯第一次相遇嘅地點，然後每次都係失望而回。
我有試過打電話畀小絲，最後發現原來佢早已經封鎖咗我。
我有試過返去景華酒店等阿暪出現，但始終都係等唔到。
連最大嘅希望──尋芯老豆，亦都唔再住喺本來嗰一間醫院。
終於，我只可以承認另一個「事實」──我再搵唔到尋芯了。
有心想避開一個人本來就唔係一件難事。一個會「消失」嘅人，某程度上就更加方便。
可能起初真係受盡挫折，但隨住時間過去，我都好似開始慢慢習慣呢種痛。
雖然話係習慣，但痛楚，就從來都冇消失過。
距離嗰日不知不覺又過咗兩個月。呢晚我又如常去到海旁，其實本身都預咗唔會等到啲咩。點知逗留咗半個鐘之後，背後突然有人開聲同我講嘢。
「你點解始終都唔肯放棄？」
我即刻擰轉身，雖然出現嘅人唔係尋芯，但我彷彿可以見到一絲曙光。
「小絲……」我盡量保持冷靜，問：「係唔係尋芯叫妳嚟？」
「係。」小絲毫不猶豫咁回答：「尋芯走之前拜託我定時嚟呢度睇下。假如兩個月後你仲係堅持嚟呢度……就將佢留低嘅訊息交畀你。」
講到呢度，佢拎起自己部手機撳起上嚟。唔使幾秒，我就收到六條語音訊息，但我冇即刻打開嚟聽，而係追問小絲：「妳話尋芯走之前……走係咩意思？唔通佢……」
「我要講嘅嘢就係咁多。」佢打斷咗我，「其餘嘅嘢你就自己聽訊息。雖然我冇聽過，但以我認識嘅尋芯，佢一定會將所有答案放晒喺裡面……咁我走喇，你自便。」
「咪住，妳唔一齊聽？」
「我應承過尋芯唔會聽就唔會聽。」小絲講完後擰轉身，然而行咗幾步又回頭，抱住最大嘅覺悟講：「其實……我曾經有一刻諗過唔照尋芯嘅意思做，由得你繼續慢慢等落去。但我最後都冇咁做，因為我好珍惜同尋芯嘅友誼……我希望，你都可以搵到自己最珍惜嘅嘢。」
等到小絲離開咗之後，我先行去一個人少、較清靜嘅地方，鼓起最大嘅勇氣播放第一條語音短訊。
「阿克。」就喺下一秒，一把熟悉嘅聲音響起，「我諗，當你聽到呢段訊息嘅時候，我應該已經去咗好遠嘅地方。放心，我冇死到。自從你嗰晚救返我之後，我就同自己發過誓，唔會再尋死……」
聽到呢度我當堂鬆一口氣，然後無奈一笑。都唔知佢哋係咪故意想嚇我，先用啲咁易令人誤會嘅開場白。
「……我只係離開咗香港。呢段訊息係我嚟到德國第二日嘅時候錄低，但到你聽嗰陣我應該已經去咗第二個國家喇。講個秘密你知呀，其實自從受到詛咒之後，我就一直冇坐過飛機。估唔到第一次坐，就係以『消失』嘅狀態，仲要係去到機場先隨便揀個地方飛……感覺就好似突然變咗有錢人咁。」
「直到飛機起飛之後，我終於開始識得驚。驚可能會突然搵到碎片恢復狀態，但結果又咩事都冇，成程機我就好似空姐咁不停行嚟行去，感覺真係好新鮮、好奇妙。唔……聽到呢度你可能會擔心我一個人去外國掂唔掂。放心喇，我英語不知幾好。而且，只要維持住『消失』狀態，食同住根本就唔成問題。」
第一段訊息就喺度結束。之後嘅四段尋芯都係講下自己嘅「旅遊」經歷，而每段佢錄嘅時候都係身處喺唔同國家──西班牙、意大利、荷蘭、挪威……唔知點解，聽聽下我個心居然唔再覺痛，仲忍唔住羨慕起佢上嚟。
終於，去到最後一段了。
「阿克，如無意外，呢段應該係我錄畀你嘅最後一段錄音。雖然前排真係玩得好盡興，但我冇忘記到自己嚟呢度嘅目的。第一件事，係搵返當年將詛咒傳畀阿暪嘅人。我唔奢望咁做就可以解除詛咒，但唔試就永遠都唔會知道結果……而第二件事，我諗你應該都好清楚。」
我當然清楚了，只係一直苦等妳嘅「答案」。
「……我唔想再傷害到你。而唯一可以做嘅，就係離開。」
尋芯嘅沙啞聲線，令我有種強烈感覺，佢應該係重複錄過呢段好多次，為咗唔想畀我知道佢曾經喊過。
「嗰晚，我之所以用刀傷你，係因為只有呢個程度嘅傷害先可以令你質疑我哋之間嘅感情……就算只係一瞬間就已經足夠。果然，你中刀之後就即刻解除咗狀態……」
「咁係因為，」我忍唔住開聲講，就算明知佢冇可能聽到，「嗰陣妳留低咗『碎片』……」
當時，代表住悲傷同離別嘅碎片，伴隨住佢嘅眼淚，令我恢復狀態。
「雖然一切仲未算遲，但如果我唔盡快離開，中斷同你嘅連繫……最後結果都係會一樣。嗰陣小絲極力反對，但我最後都說服到佢；至於阿爸，佢最後都明白咗我嘅苦衷。」
「阿克，其實我仲有好多嘢想同你講，但再講就永遠都講唔完……我要學識放手，你都係一樣。我希望最後呢十秒，除咗代表住短信嘅結束，亦係代表我哋故事嘅結束……」
「阿克，如果你真係鍾意過我……就忘記我喇。」
「拜拜喇……仲有……對唔住。」
*
*
*
半年後，某時某地。
「如果，真係咁樣完結，咁我哋嘅結束又代表住啲咩？」
「阿克！？點解你會搵到……」尋芯見到我嗰刻當然好意外。
「尋芯，妳聽我講埋先。嗰晚聽晒所有訊息之後，我真係喊咗好耐。但喊完之後，我諗返起伯父曾經要我應承佢──若果有一日妳消失咗，我一定要搵返妳，然後……」我走上前緊緊握住尋芯隻手，「……唔會再放手。」
「估唔到阿爸居然要你……但你唔怕個詛咒又會……」
「我有個諗法，到而家都仍然堅信係冇錯。」我握住尋芯隻手行到去湖邊，「記唔記得當日我消失嘅時候，妳仲係可以見到我？就正如妳消失嘅時候我見到妳咁。」
「嗯……」
「或者，我哋係命中注定要做對方嘅另一半。」我好直接咁講：「就算最後真係解除唔到詛咒，最壞嘅情況都係喺我哋之間傳嚟傳去。但只要我哋身邊仲有對方，其實呢件事又有咩咁得人驚？」
「你咁講……又好似有道理……」雖然同意，但下一秒尋芯又變得疑惑起嚟，甚至試圖甩開我隻手，「阿克……我開始驚，驚所有嘢都係一場夢。你點可能會搵到我？根本就冇可能……唔通……係小絲？」
「冇錯。」我點頭，「就好似妳當初說服佢咁，我最後都說服到佢話畀我知妳身處喺邊個國家同城市。但一個地方咁大，要搵到妳其實真係花咗我好長時間。」
距離第一日出發，其實已經過咗五個月。
時間、金錢、工作──可能我係犧牲咗好多嘢先可以展開呢段旅程。但如果冇犧牲，又點會識得珍惜？
「阿克，但你嘅諗法都未必係絕對，或者終有一日……」
「咁我哋就係呢一日嚟之前，好好珍惜同享受呢段日子。」
講到呢度，我慢慢將臉湊向尋芯。可能佢有一秒猶豫過，但最後都係接受咗我嘅心意。
消失的心，對尋芯嚟講係代表住碎片；對我嚟講，就係一位珍惜嘅愛人。
一吻之後，我喺佢耳邊低聲講：「尋芯，我愛妳。」
「我一直……都等緊呢句說話。」
我同尋芯嘅故事結局會係點，喺呢刻的確係未知數。但至少，我哋都深信，接住落嚟呢段日子，肯定係我哋人生最快樂嘅時光。
（全文完）
我們都在尋找，那顆消失的心（一）
https://hk.news.appledaily.com/district/realtime/article/20180314/57941975
我們都在尋找，那顆消失的心（二）
https://hk.news.appledaily.com/district/realtime/article/20180324/57988829
我們都在尋找，那顆消失的心（三）
https://hk.news.appledaily.com/district/realtime/article/20180330/58002020
我們都在尋找，那顆消失的心（四）
https://hk.news.appledaily.com/district/realtime/article/20180406/58033536
我們都在尋找，那顆消失的心（五）
https://hk.news.appledaily.com/district/realtime/article/20180413/58056545
我們都在尋找，那顆消失的心（六）
https://hk.news.appledaily.com/district/realtime/article/20180420/58093001
我們都在尋找，那顆消失的心（七）
https://hk.news.appledaily.com/district/realtime/article/20180427/58116202
我們都在尋找，那顆消失的心（八）
https://hk.news.appledaily.com/district/realtime/article/20180504/58141184
我們都在尋找，那顆消失的心（九）
https://hk.news.appledaily.com/district/realtime/article/20180511/58175243
我們都在尋找，那顆消失的心（十）
https://hk.news.appledaily.com/district/realtime/article/20180518/58201203
我們都在尋找，那顆消失的心（十一）
https://hk.news.appledaily.com/district/realtime/article/20180525/58230656
專欄作者簡介：
有心無默
網絡作家，以創作為樂。真實身份為故事星人。著有《西營盤》、《絕命上映》、《絕望走廊》等暢銷小說。
Facebook專頁：
https://www.facebook.com/Echo.of.Heart/
發掘更多身邊的小城故事，請LIKE 蘋地Facebook Page，並設定為「搶先看」： https://www.facebook.com/appledailyland/