究竟李克勤把聲易認定難認,呢兩日都唔少人討論緊,呂方今日去到柴灣NOWTV受訪,對於克勤參加《蒙面歌王》時,竟遭評判之一巫啟賢認不出克勤把聲,呂方指自己未睇克勤條片段,但就話:「克勤把聲易認,巫啟賢應該好熟香港樂壇,佢細細個應該有聽譚詠麟,克勤比較後生,可能認唔出都唔出奇,加上樂壇咁多歌手。」
唔少歌手北上參加歌唱比賽,問呂方有冇興趣?佢覺得似克勤唱兩首歌,畀巫啟賢評價都冇所謂,又話幾好玩,亦唔介意被批評歌藝。
有指克勤今次參賽收750萬酬勞,佢笑住話:「我應該有七百四十五萬,其實之前北京經理人問我玩唔玩《我是歌手》,咁我唱咗咁多年,都已經係歌手咪冇參加。」比賽未玩過,但之前做過歌唱節目評判,最後自覺口才不佳同唔夠狠就冇再做。