歐陽風過去3個月推介過兩次隻高陽科技（818），認為係長線具潛力嘅冷門黑馬，去年9月推介時股價仍在1.40元水平，本周最高造3元，3個多月升幅逾1倍。呢間公司做櫃員機生意，主要客仔來自中國，未來中國銀行業由人手變做更多自動化服務，櫃員機生意可謂長做長有，集金融、資訊科技同工業3大特質於一身。
另一隻冷門黑馬，係理文集團（746），呢間公司原本做開手袋，雖然生意愈做愈大，但係面對同業競爭，邊際利潤卻愈來愈細，用同樣嘅資本、投入同樣嘅精力去做呢門無乜發圍嘅生意，倒不如試試轉型，做過另一門發展空間更大嘅行業，呢樣嘢，理文造紙（2314）就做得非常成功。
集團去年底以6億日圓，向一間日資公司購入江蘇沿江工業園，一幅面積500畝以上嘅土地，生產甲烷氯化物產品，此種化合物，可用於空調雪種。此項目首期投資額達3.6億元，料最快在07年底前投產，目前已投放約1.6億元作購置廠房地皮及機器設備。理文集團近期兩次試過2元阻力後轉向橫行，近1個月則似在造旗，昨已破旗，蓄勢破頂，可列入重點觀察股票名單之一。

廖企升勢停不了

近日廖創興銀行正式易名為創興銀行（1111），股價易名後相當之生猛，過去一個星期由17個幾升到19個幾，不過升幅不及母公司廖創興企業（194），股價由9個幾升到近12蚊。股價急升，又傳創銀賣盤，不過諗諗確實有道理，點解偏偏要走咗個姓氏「廖」字，係咪要淡化家族形象？聰明嘅資金梗係先買為敬。
歐陽風