當年今日
關於我們

【加油!】河國榮轉戰九龍城兩日租金400蚊:見步行步

蘋果日報 2014/05/10 06:00

西貢租金九龍城河國榮見步行步

前無綫藝員、「鬼佬」河國榮為咗生計,日前喺西貢擺檔賣D.I.Y.首飾,由於呢個地方只係租出一個周日,所以今日河國榮同太太轉戰九龍城廣場,事關呢個商場同香港商業設計協會合作,舉行為期兩日(今、明)嘅「藝術市集」,開賣時間為中午12點至晚上8點。

今早大約11時15分左右,河國榮同太太抵達商場之後,將行李箱內嘅首飾掛喺首飾架上;45分鐘後,開買時間開始,唔少市民都有到攤檔駐足細看,亦有街坊認得河國榮,同佢打招呼。河國榮透露兩日租金都唔使400蚊,相比西貢嗰次日租750蚊平好多。

講到日前喺西貢嘅生意額,河國榮話:「過得去,幫襯嘅人都係太太嘅朋友,佢哋特登去西貢支持佢。其實西貢嗰個位置又偏僻又遠。」預計今日生意會好啲?河國榮話:「唔咁諗,雖然人流多,加上母親節...睇吓點啦,我怕希望越大失望越大,不如見步行步。」