吳雨霏(Kary)最近被傳同網球王子洪立熙(Brian)傳復合，今晚Kary到尖沙嘴出席Versace旗艦店開幕，被問到係咪同Brian復合？佢就話:「之前回應咗喇，順其自然啦。」未有否認喎。

Brian係網球王子喎，咁今次復合，邊個發球先？Kary就話:「其實好順其自然，我啱啱再返番教會，原來佢一直有返，咁就再見面囉。」算唔算係神的安排？Kary話:「都係，好自然。」依家心情？「好sweet好開心。」

咁同Brian嘅目標係咪結婚呢？Kary甜絲絲地謂:「都ready，今次好有緣份，大家好認真，對方都係。」至於會否閃婚？佢就都好坦白咁話:「都會計劃下，父母都好鍾意對方，好開心見到身邊人都戥我開心。」但係之前有傳舊愛余文樂係因為放唔低ex黃伊汶而同Kary分手，Kary就禮貌地謂:「佢嘅事唔回應喇。」

同場嘅吳千語本月27日就21歲生日，佢話入行咁耐都未試過生日正日放假，今年終於可以，故計劃喺香港過，仲話男友林峯應該都有假放，或者屆時會同一班朋友慶祝。

問到林峯係咪成日俾驚喜你呢？千語笑道:「唔估喇，因為我成日估到，都冇surprise。」嘩……千語即補飛謂:「佢係一個好細心嘅人，有時用兩三個月整小禮物，我知佢好忙，估佢應該係拍完劇抽時間整。」咁會唔會話俾男友知你想收乜嘢禮物呢？千語話:「唔會喇，等佢覺得我鍾意乜嘢就送乜嘢啦。」