百麗國際上市嘅新聞多多,唔單止喺招股時凍結咗4464億銀資金,破咗工行紀錄,首日掛牌股價仲急升31%,而鄧耀就以257億幾身家,打入《福布斯》香港富豪榜嘅第13位。
其實早輪好多傳媒都有報道《福布斯》香港富豪榜,但一向低調嘅鄧耀,似乎唔多理呢啲虛榮,噚日以香港鞋業總會會長身份,出席總會搞嘅「香港鞋款設計比賽」頒獎禮時,華華走去恭喜佢,佢仲一頭霧水,跟住要華華話番畀佢知做咗香港富豪。
鄧耀話,家陣成日中港兩頭騰,邊度業務要佢,佢就去邊咁話,忽然有人話佢知做咗香港富豪,自己又冇睇過《福布斯》嘅報道,所以畀唔到回應,連開唔開心都講唔到畀華華知。
唔知佢係太突然唔識反應?定係太超然唔多在乎喇?