《蘋果》迎接20周年報慶，一班《蘋果》開國老臣、元老、新知舊雨等，今日中午喺又一村預祝，八方到場，見到好多前輩、舊同事，近百人出席，非常熱鬧；大家七嘴八舌重溫當年創刊時嘅日子，話最難忘係籌備開報前半年時間，士氣高漲，人人都行多一步、做到最盡，期待創造傳媒新時代，係最開心嘅日子，亦都因為大家齊心搏命，《蘋果》創刊後銷量直線上升；據講肥佬黎目標係創報首年每日銷量20萬份，最後超標完成，銷量直達30萬份。

好多人都知當年肥佬黎搞《蘋果》，係落手落腳瞓身去做，十分緊張銷量，如果當日賣剩咗，「回紙」多過1,000份，一眾高層就好大鑊，因為肥佬會問責，指罵一定係因為選錯頭條，影響銷量，事隔多年，好多元老對每日面對咁大壓力歷歷在目。今日現身嘅前高層有「神童輝」、堅林、仁哥、基哥、泉哥等，主角可以話係羅燦，事關燦哥下個月就「登六」，今日大家率先賀佢六十大壽，恭喜恭喜。