當年今日
關於我們

【李八方online】容海恩自詡好過李梓敬 若要極端藍寧揀何君堯

蘋果日報 2020/03/18 18:48

葉劉淑儀新民黨李梓敬容海恩

新民黨容海恩噚日突然怒轟該黨初選係為「某人」度身訂做、結果內定,宣佈對黨內初選採取「自我隔離」政策,退出唔玩後,除咗令政界花生格價即時急升,連該黨主席葉劉亦表示「O嘴」,話容海恩係「諗多咗」。

容海恩今朝喺電台話自己好過李梓敬,例如忠誠度高,喺某啲事情能「企硬」,又寸爆話李梓敬由淺藍到深藍,如果要揀「極端藍」,佢寧願揀何君堯囉,似乎真係好不滿。

八方今日見到容海恩,問佢點睇葉劉話佢「諗多咗」,佢話唔會,「我自己有自己嘅觀察囉」,又話噚日下晝曾同葉劉傾過偈,退出初選心意已決。

問到同葉劉傾完後兩人關係有無改善?佢就話:「無⋯⋯無⋯⋯無差過啊,從來都⋯⋯無問題㗎」。

咁突然退出初選係咪因為有啲答應咗提名佢嘅黨友縮沙?容海恩只話:「總之喺呢個stage(階段),有啲⋯⋯有啲⋯⋯有啲事情啦,但唔講其他嘞」。

佢又叫大家唔好將事件同佢老公袁彌昌嘅政治立場拉上關係:「我諗唔好扯得太遠啦,哈哈哈,都係我自己嘅意願嚟嘅」。至於幾時決定係咪自行參選?佢就話要睇事情發展,不能排除將來會採取乜嘢行動喎。

-----------------------------
【武漢肺炎】專頁
全民自救 抗疫資訊盡在《蘋果》
-----------------------------
無懼警暴 學懂自救
《抗暴之戰●法例須知》讀果 上架