香港回歸二十周年，樓市重現1997年爆煲前瘋狂一刻。連李嘉誠旗下長實（1113）荃灣的海之戀5月開盤，吸引近萬人排隊，首批496伙即日沽清，令有不少人聯想起1997年，與海之戀僅一海之隔的被戲稱為「浩劫灣」的青衣灝景灣。

中原集團主席兼總裁施永青接受本報專訪時指出，97時樓價絕對是高峯，「人人恨有樓」，時任特首董建華提出八萬五建屋計劃，簡稱八萬五，即每年供應不少於85,000個住宅單位，結果是「非常成功」，因為遇上了一場亞洲金融風暴，結果98年樓價已經跌到「人人負擔得起」，只是無人敢買而已，人人都怕跌，完全是「賤物鬥窮人」。

施永青坦言，自己當年都有支持過八萬五，承認自己都計漏數，計漏了「資產蒸發」，當時跌到無人敢買，當時的業主，前半生儲完錢買樓，後半生又要再儲錢贖樓，連岳母揀女婿，都揀個無樓的比較穩陣。

到2017年的今日，施永青話，岳母揀女婿，就當然點都揀個有樓，而且眼前他見到的樓市，升的機會多過跌，暫時就看不到好快會爆煲，見不到泡沫，因為，市場有錢，資金充裕，有能力買樓的仍大有人在，銀行體系結餘近12萬億元，比97年前多3倍。現時日日都聽到有人叫政府出招，但施永青認為，其實政府的招數已經成功打擊炒家，令外地及機構的投資者減少。

對於地產界潮語成功需「父幹」 ，意指年青人買樓，好多昤都要靠父母幫手。施永青對於細仔施俊嶸他日想買樓，就講明都會幫手。幫幾多，就要睇施俊嶸本身可以同銀行借幾多，即係「佢如果同銀行借到600萬，我就資助返佢600萬」，要鼓勵他搵得更多，先可以同銀行借得多，自然可獲資助就更多。

記者：黃嘉銘

攝影：李潤芳

掌握財經生活資訊，即Like「蘋果ATM」fb專頁啦！
http://fb.com/appledailyatm