喺中環行街，隨時可以碰到尊貴的立法會議員，例如何俊仁永遠行色匆匆，似有大把嘢趕住去做，曾鈺成與譚耀宗行路就他條得多，反映出民建聯嘅首腦胸有成竹，安居平五路也。鄭大班就經常與石禮謙一齊行街，上陸羽飲早茶或到上海總會吃午飯，甚為得閒，難怪嘅，鄭大班話明出年唔再參選，石禮謙在地產建造界功能團體，貢獻甚多，好難搵到人挑戰佢，明年穩坐釣魚船，立法會議席唔少得佢一份。
呢日又碰到鄭大班，首先問佢忙啲乜，然後問佢點解泛民主派大敗。佢點都係講政治先，認為民建聯組織嚴密，資源豐富唔在講，泛民主派在地區工作唔得持續，浪費咗四年前嘅大勝，以後四年唔知點夠民建聯玩，香港好易成為「一黨專政」，講完就哈哈大笑，認真瀟灑。至於忙啲乜呢？哈，五十年重逢，搞開成為潮流，鄭大班又嚟呢一套，佢話搞緊深水埗福榮街官立小學成立五十周年紀念，與一班小學校友於二○○八年一月五日返回母校團聚，屆時散佈全球嘅歷屆畢業生會返香港共聚一堂，當日係星期六，晚上希望有盛大聚餐，二三十圍應該走唔甩。
點解話希望呢？鄭大班話：「香港旺到不得了，所有酒店宴會廳全部卜滿，我哋出動到霍大班去搵地方，都未搵得到。」原來霍大班建寧，霍建中兩兄弟都係福榮街官小校友，此外還有以前佐丹奴嘅財務總監李國祥（BrianLi），前滙豐總經理劉智傑，前渠務署署長張達烱，前教育署副署長湯啓康，好耐以前主持警訊後來成為律師嘅江焯開等人。霍大班管和黃，和黃轄下有海逸酒店，連霍大班都卜唔到位，可見香港在聖誕新年期間旺到爆燈。
五十年前嘅小學生，係戰後babyboomer第一代，唔少人早已發達成材，上咗岸步入退休年齡，故此對回憶懷舊呢回事特別有熱情，凡有大旗手振臂一呼，校友必然響應。鄭大班希望所有福榮街官小校友登上網頁www.fws.hk了解五十周年紀念活動詳情，報名參加喎。