噚日下晝1點幾,梁家榮揸住部紅色三菱四驅車,去旺角花墟買咗棵鐵樹,點知返屋企途中架車行唔夠幾條街,就喺彌敦道同亞皆老街交界嘅交通黑點出事。據講,事發時三個內地女遊客喺安全島衝出馬路,梁家榮即刻扭左軚閃避,但右邊車頭擋風玻璃仍然撞到其中一個44歲姓田嘅女士。
梁家榮事後落車慰問傷者,但傷者唔識廣東話,佢惟有轉台用普通話叫佢唔好亂郁,然後報警。三位女士原來係嚟自甘肅嘅三姊妹,攞雙程證嚟香港探親。可能係人生路不熟,據佢哋同警方講,過馬路時冇留意交通燈號。
早前王維基入主亞視冇耐,56歲嘅梁家榮就宣佈離職;到王維基閃電落台前夕,梁家榮唔止獲得公司挽留,仲升職做埋高級副總裁,表面睇嚟都黑唔晒!對於今次買鐵樹要擋乜嘢煞,裏面又暗藏乜嘢玄機,梁家榮就話唔想多講有關亞視嘅事務,只肯講:「呢次真係無妄之災。」唔好誤會,佢講嘅係今次交通意外,唔係講之前嘅亞視風雲。據講,梁家榮噚晚已經去咗醫院,探望情況嚴重嘅傷者。