美元跌個七零八落，金價又續創新高，一切已證明通脹預期打敗了通縮預期，在通脹預期持續升溫下，資產價格不斷膨脹，近日全球股市牛氣冲天，相信不少讀者已在享受這個資產升值潮。士佳沒有預知能力，無法預測這個浪潮可以持續多久，但環顧全球主要市場，冇幾多國家有條件或願意行緊縮貨幣政策，短期內應難以扭轉資產大漲小回的格局。
所謂「通脹猛於虎」，大家可能會質疑全球復蘇步伐未穩，不控制物價唔怕阻礙復蘇嗎？美國似乎真係唔怕，上月的議息會議紀錄顯示聯儲局傾向推高通脹，因為若然預期通脹率低迷，在高失業率下，消費市道將疲不能興，有礙經濟增長。若美國以此為重要施政方向，相信加息將遙遙無期，加上量化寬鬆又有機會加碼，資金又多又平，怎會不炒高資產？
近日有銀行推銷貸款，雖然士佳無此需要，但見息口之平都幾嚇人，毋須抵押便可以一個平到你唔信的息率借幾百萬元，借來買股票收股息都有賺。

暫時亦不敢買期貨

投資者見大市不停升，就會害怕入市，驚接火棒，而且會覺得股票貴，不知是追好還是等好？其實有時真係唔想得太多，大市要挾升，惟有買啲等啲，博其再上一轉，總好過冇貨長嘆，本欄昨日亦提及現階段應回調有限，投資者是時候要克服畏高症了。
若問我市場是否有泡沫，答案是必然的，惟有分配注碼，現在先買7至8成貨，餘下的吼低再買，自己暫時亦不敢買期貨，繼續買股票，我會「上中下」各買一點，「上」即是股價已在頂部的一批、「中」是已從低位回升不少的一批、「下」就是股價貼底而行的一批，而注碼分配上會是順次序，用上足球常用的「四四二」戰陣。

張士佳
寶來證券（香港）董事　投資服務部
mailto:[email protected]