鄭少秋嘅「丁蟹效應」可以話令到股民聞風喪膽，秋官主演嘅亞視劇集《香港傳奇：榮歸》噚晚首播，對撼無綫重頭劇《歲月風雲》，之前大家都擔心股巿會跌，果然噚日股巿收市下跌咗215點。

曾暴瀉5千點

其實今次亞視專登揀星期三（18號）首播新劇，據亞視高層葉家寶話係搵高人擇過吉日，不過一樣難逃股巿下跌嘅命運。
丁蟹效應有幾勁？馮仁昭翻查資料，92年秋官喺劇集《大時代》中飾演股巿投機者丁蟹，劇集10月播出，恒指四日內暴跌598點，之後十幾年每逢秋官有新劇上映股巿均跌，94年《笑看風雲》跌2,000點、97年12月嘅《江湖奇俠傳》撞正金融風暴，股巿暴瀉5,324點，99年《神劍萬里追》跌1,176點，00年《世紀之戰》七日跌過千點，03年《非常外父》跌500點，04年《血薦軒轅》跌550點，05年播《御用閒人》，恒指亦出現過明顯下跌，今年年頭重播《御用閒人》，3月6日股巿跌777點，至農曆年過後3月14日開巿，股巿全日跌496點，都咪話唔邪。唯一一套打破跌巿宿命嘅，就係舊年4月播映嘅《潮爆大狀》，恒指喺首播日急升258點。

秋官：好快升番

近日秋官正在台灣處理私人事，對於有份主演嘅《榮》劇噚晚首播，香港股巿再被丁蟹效應影響下跌，秋官噚日喺電話訪問中話：「其實股民唔使擔心，冇事嘅，大家可以趁低吸納，好快就會升番。」