日本女歌手濱崎步日前開騷明顯去腫，佢較早前為NTV錄影嘅節目《閒聊007》就於前晚播出。38歲嘅步姐相隔4年再亮相綜藝節目，佢接受現場一眾諧星主持訪問時大談生活逸事。雖然步姐搵錢已唔及當年，但佢受訪時就有意無意公開晒命，更自言豪宅要由五個工人幫手打點，佢又話自己唔識操作智能手機，有網民直指步姐經常更新Instagram及Twitter，唔知邊句先至真。

步姐提到每次開騷都會帶埋愛犬到後台，同場嘅原田泰造自薦話要做步姐條狗，佢更即場趴地扮狗吠，搞到步姐擘大口喪笑，之後演歌界天王細川高志驚喜現身，步姐竟然向前輩跪地以示尊重。節目仲搵嚟諧星配合步姐名曲《Boys And Girls》全裸跳舞，搞到步姐再次表現亢奮。