因韓劇《來自星星的你》爆紅嘅金秀賢,噚日應莎莎(178)邀請來港出席發佈會,「都教授」唔止迷倒名媛、少女,一班平日指揮若定、着重理性分析嘅分析員、財金界女強人都發動人情牌,爭取見金秀賢一面,當中就包括金利豐(1031)老闆娘朱李月華同埋股評人胡孟青。
金秀賢噚日喺尖沙嘴一間酒店出席發佈會,莎莎老闆郭少明請來幾百位朋友、嘉賓,當金秀賢一出場,全場幾百名女人同一時間尖叫、企起身,同埋舉起手機喪影,情況爆笑兼壯觀。
金利豐老闆娘朱太話係陪朋友去見金秀賢一面。佢原本冇留意《星星》,後來越來越多人講,佢先好奇走去睇,一睇就鍾意,指金秀賢飾演嘅都敏俊有錢、靚仔又叻,簡直係完美元素集於一身嘅男人,可惜佢冇機會同佢合照,只能遠觀。