向來同狼英關係甚差嘅立法會主席曾鈺成，噚日唔知有意定無意，暗踩狼英係「三流人才」。曾主席向呢位曾經講過「N屆唔選」嘅特首翻舊賬，揭狼英當年曾經講過「三流人才先會從政」！曾鈺成話，好高興狼英最終打破呢句說法從政。係踩定係抬？實在係不言而喻啦。
曾鈺成噚日出席一個午餐會，主講政治領袖要有啲乜料子，話題點會離得開狼英呢？當佢講起點樣吸引人才從政，就話狼英喺回歸前，接受一份期刊訪問時，被問到日後會唔會出嚟選特首：「佢答『我梗唔會啦！」佢仲加多一句話：『喺香港，一流人才從商，三流人才先會從政』，我好高興佢打破呢句（話）。」曾主席話，狼英唔會介意佢講番呢段歷史出嚟，因為狼英曾經同佢承認有講過呢番話。

話領袖「要有政治道德」

不過，曾主席話，希望香港有普選後，香港唔能夠交畀三流人才嚟做主，「我哋想多啲一流人才去做主！」嘩，乜講到咁明呀！
唔知係咪驚現場人士唔明，曾鈺成話，政治領袖要具備政治道德，市民先會有信心，信任佢會做對社會同對人民最有利嘅政治決定。政治領袖做政治決定時，要記住「義、利、重、勢、力」，即係睇社會公義、平衡各方利益、輕重緩急、社會大勢，最後就係能力：「我無意得罪任何人，但有啲部門如果係弱，推出政策時，都要諗吓負責嘅官員，有冇能力去推呢？」講到呢度，大家腦海係咪諗起囤地波、大嘥鬼、吳得掂之流？仲有無數低調到冇人識嘅副局……唔知呢啲係第幾流人才呢？

李八方
mailto:[email protected]

【壹錘定音】星期一至五，早上8點開咪！
http://hammerout.hk

立即更新《蘋果動新聞》app
https://bitly.com/AppleDailyiOSApp
https://bitly.com/appledailyandroidapp