權哥一聲令下，全港嚴厲打擊垃圾蟲，便衣督察辣手掃蕩垃圾蟲旺區。不過唔到你唔信，垃圾蟲人贓並獲後，不但不知廉恥，不肯就範，還吹雞班馬，諗住人多勢眾，靠惡脫罪。
垃圾蟲吹雞，是名副其實的「雞蟲」，份外乞人憎，應該罪加一等，罰夠三千！
沙士疫潮進入尾聲，特首辦與商界急急推出吸引旅客的宣傳。有人提議集體燒口罩，象徵香港一天光晒。遊客重見香港人的「真面目」，一定有番安全感。云云。
點燒口罩好呢？炭燒BBQ幾吸引，雜錦串燒，賣相亦唔曳。叉燒滷水夠晒噱頭，搭口罩過濾的香滑奶茶，買一送一，有助推動本地特色吃食。

問題係，口罩燒了，垃圾蟲依然故我，繼續糟蹋污辱香港的「香名」。這種臭蟲，跟病毒一樣為禍社會，一定要斬草除根。垃圾蟲吹雞後，等他的同黨現身，來個雞蟲桑拿火攻！燒雞，不是野味，冇人會投訴。趕絕雞蟲，將他們趕回砵蘭街的雞竇，做永遠的人肉炮站隔離。香港與其建一座小湯山疫院，不如興建垃圾雞蟲的監獄。這些敗類，一天不吐痰隨處便溺便會發瘋罵人，搵食環署衞生督察出氣，甚至會動粗。罰款無效，收監有據。垃圾蟲監獄做埋中央屠宰外判，雞蟲就可以吹雞吹個飽。