我可以不厭其煩咁不斷再讚頌溫哥華嘅越南牛肉河有幾好食，一大碗清澈見底的牛骨湯，味道卻是非常牛精，一啖湯入口，滿口是牛，無化學，無添加，鯨飲整碗牛肉湯後不會唇乾舌燥。越南粉又白又滑，太爽則不能沾上足夠湯味，太腍則口感失去，此處的越南粉，總之啱啱好。唔好睇主菜，淨係睇配菜都開心，各式各樣的香草葉、指天椒、一大碗一大碗的混合魚露，還有胖嘟嘟的生豆芽。曾聽蔡瀾先生說過有兩種東西一摘下後便每分每秒在「收水」，由原產地來到香港，其實水份已乾了一半，比起在樹上熟摘來吃的滋味，蚊髀同牛髀，此兩種東西便是沙田柚及豆芽。

溫哥華有許多豆芽田，有些越南食肆甚至在附近便可採摘到新鮮豆芽，洗摘乾淨後上枱，用滾熱牛肉湯輕輕一浸，菜腥全消，入口嗦嗦有聲，牛肉湯的濃香加上新鮮豆芽的清甜，伴着一大口一大口的牛肉粉，每日吃一碗也不會厭。
除了牛肉粉，還有多款越式美食：「乾撈粉麵」，半粉半麵加肉碎、豬膶、豬肉、香葱，附送一大碗豬骨湯；「蒜茸牛油牛肉加黑醋汁」，生牛肉加以上配料，既是前菜，也是主菜；還有那些經濟實惠的碟頭飯：「香葱香茅雞扒飯」、「香茅牛肉加荷包蛋飯」、「越式扎肉、肉餅、越式春卷、豬扒飯」；還有越式飲品「雪啡奶」、「牛油果奶昔」、「鹹青檸梳打」，流口水未?!