中國人壽（2628）挾王者回歸A股之勢，喺1月2日創咗28.3元嘅上市新高，但遇着大跌市，唔理乜嘢王都冇所倖免，雖然噚日股價回升6.7%，上返20.55元，淨係用咗兩個月，每股就跌唔見27.39%，大嗱嗱7.75元。

網友ericliu喺《XocatII討論區》話：「我諗會跌到去18至19蚊。」fufuwing回應：「若果真係跌到落18蚊，我必入！」睇嚟呢位人兄吼咗國壽好耐。leoxi就無咁睇好，「若果中國股市再跌多啲，國壽應該仲有得跌。」
悲觀情緒不斷感染同惡化，ericliu話：「其實我自己應該會等到16蚊先考慮購入。」討論區常客peninsula話：「我睇今次應該唔止16蚊，應該可以去到15蚊！」即係由高位跌咗差唔多一半。agenttong就加一句：「我同意，因為國壽市盈率真係好高。」
睇完網民嘅估計同對應策略，大行點睇呢？BNP法巴認為當國壽跌到20蚊樓下，就可以「買入」，原因有三：第一，預期中國經濟可以維持強勁增長，主要係由消費增長所帶動。法巴仲估最快都要等到09年，中國經濟增長先會放緩。
第二，人民幣升值。法巴話喺全球資金仲係咁流入中國嘅情況下，預期人民幣兌美金，喺未來24個月內仲會升7%，又係要到09年先有機會跌。第三，內地合資格境外投資者（QFII）額度仍相當有限，即係話投資者要買中國嘢，始終都係要買H股囉！