倪晨曦坐月後急復工 湊B親歷餵母乳脹痛之苦
蘋果日報 2020/12/04 19:17
倪晨曦餵母乳
倪晨曦坐月後即復出工作。（蘋果日報 / IG圖片）
倪晨曦（Elva）今年1月與從事金融的男友吳嘉釗（Vincent）在夏威夷舉行婚禮，雖原定在香港會舉行婚禮，因疫情影響未能擺喜酒，兩人於今年9月在港簽紙註冊，上月2日Elva誕下囝囝Virgil，日前才剛剛滿月。剛坐完月的倪晨曦急急復工，今日以一身中性西裝look現身拍廣告，工作人員送上蛋糕賀她囝囝滿月，倪晨曦雖未完全收身，但狀態良好，她說：「最初都緊張有壓力，驚水腫，肥咗唔少，人哋話生完唔使擔心，會好快復原，但真係冇咁快，仍有8kg先回復未生時嘅體重，不過我唔心急，湊bb好辛苦，需要體力要食好啲。」
坐月其間倪晨曦緊張BB反應，少少聲音都會好敏感，頭一星期最辛苦：「最初同老公都諗得好輕鬆，請陪月只係日間，但出院後全日冇瞓過，一星期後改為24小時陪月，好似入咗天堂咁開心，夜晚有人幫手可以瞓吓。」倪晨曦為BB健康餵哺母乳，親嘗母親之苦：「身體未試過咁樣，成個人會轉變，餵人奶時都會痛，又難抽身。」幸獲老公體諒幫忙，她笑說：「佢喺隔離幫手已經係最好禮物，比想像中親力親為好多，由生嘅時候一路陪住我，又好樂意湊BB幫BB沖涼、餵奶、掃風，過兩日陪月走就靠晒老公。」她又分享夫妻湊B趣事：「好容易請飲茶（瀨尿），老公都試過。」此外，近日疫情嚴重，倪晨曦不會為兒子搞百日宴，即使親戚來探BB都要做足消毒防疫，自己也不例外。
倪晨曦表示仍有回復未生時的體重，仍要努力。（蘋果日報）
倪晨曦今日以現身拍廣告，工作人員送上蛋糕賀她囝囝滿月。（蘋果日報）
倪晨曦為BB健康餵哺母乳，親嘗母親之苦。（IG圖片）
今年9月倪晨曦和男友在港簽紙註冊結婚。（IG圖片）
-----------------------------
《蘋果》英文版免費試睇：了解更多
-----------------------------
支持蘋果深度報道，深入社區，踢爆權貴，即Like蘋果專題及調查組FB專頁！