今年25歲、有美人魚之稱嘅香港游泳選手歐鎧淳(Stephanie)，近1年由泳界殺入演藝界，除咗頻頻出席商演活動，又幫動畫電影配音，不過淳BB話拍電影就未必會啦，事關佢話怕同練水時間撞咗，始終都係比賽行先。

除咗要專心比賽，舊年同退役水球手陳浩軒(Jonathan)分手後，鎧淳BB話咁快又有新歡上畫，呢個就係拍電影《點五步》嘅胡子彤。據知鎧淳BB係游泳港隊，至於胡子彤係棒球港隊，同樣係運動員自然較多話題，有指本來佢哋一大班運動員一齊去玩，後來二人開始單獨約會，鎧淳BB就係畀胡子彤嘅風趣幽默俘虜咗。

日前(14日)晚上約9點，《蘋果》見到着住低領黑色Tee嘅歐鎧淳，揸車載住男友胡子彤喺嘉亨灣附近出現。鎧淳嘅座駕駛到北角城市花園附近，二人落車分頭行事，男嘅去買凍茶，女嘅去便利店買嘢食，行動夠晒合拍。

夾啱時間上返車，鎧淳BB就再揸車過海到竹園嘅天馬苑，泊低車就同男友蹺住手糖黐豆漫步街頭，喺男友面前，鎧淳BB一時小鳥依人，一時青春跳脫，之後就雙雙返回寓所。