香港迪士尼樂園暫停開放近5個月後今日（18日）重開，但灰熊山谷內的極速礦車隨即出現故障。本身已購買全年證的市民羅小姐得悉迪士尼樂園重開後，早於周一（15日）已預約今日入場，「本身個annual pass4月過期，但佢（樂園）嗰邊話可以延長個會籍，諗住趁第一日冇乜人預約就入去迪士尼玩下」。

羅小姐今午2時抵達迪士尼樂園，隨即到灰熊山谷排隊玩極速礦車，當時她已玩了兩轉，至下午4時左右，玩到第三轉時列車居然發生故障，「列車上有12至14人，起初都正常，但車速比之前兩次慢咗，我哋都覺得好奇怪，後尾去到上斜坡嗰個位嗰陣，突然chok一chok，冇幾耐就聽到職員廣播」。

5分鐘後，羅小姐見到4至6名職員與兩名維修部員工到場檢查，又安排她們沿路軌樓梯行落地面，並向所有乘客派發蒸餾水及極速礦車的fast pass。她坦言園方給予fast pass根本沒有用途，又對今次事件感到失望，「其實都唔多人排隊，之前都聽過灰熊山谷有故障，諗住重開冇乜人玩都應該冇乜事，點知都係出事，唔知係咪好耐冇開架車所以故障」。

《蘋果》正就事件向迪士尼樂園查詢。

-----------------------------
打國際線 《蘋果》英文版免費試睇 按此了解更多
英文版已登錄新版《蘋果》App按此下載/更新
-----------------------------
你敢爆，我敢獎！ 立即WhatsApp《蘋果》24小時爆相爆片熱線 或致電：63836568