關於學童小巴開快車一事，有一位讀者以前開辦學童小巴公司，來電郵表達司機方面嘅情況，節錄如下：
「學童小巴爭分奪秒，除咗司機性好開車快，有時係學校同家長迫成，價要平，咁車主盡量接滿額，安全喎，一定要入屋邨入便上落，家長個個都叫你響佢樓下設站，唔理禁區、巴士站都叫你開站，最叻嗰句係人地都係咁。工人接送就準時，若老人家就例遲，等得嚟下站啲人又黑面指罵投訴，司機焗要開快啲。放學遲多數係訓話囉！學生玩失蹤、上廁所、上課室搵嘢，駛離校門晏，司機又要追時間，又怕投訴又趕下轉，有乜方法唔急呢？限一程車45分鐘，若果只五個站，又坐得滿，司機係可以他條，不會快車。所以我做咗五年校車，蝕到驚！亦對不合理要求及投訴火滾，終於成間公司賣盤，因牌有價可袋成千萬，可好好過日子，否則學吳儀裸退，白勞碌一輩子！校車好難做，廠車又冇得做，運輸署係倒米，接到合約要申請獲批在案，你至好行車，否則停牌釘牌，批又冇標準可言！
大陸愈做愈開放，香港倒退，二世祖式，個個唔好做，冇麻煩俾班官，佢地樂見，招呼幾個大商賈就啱！」
呢位讀者Ｃ對經營校巴，滿肚怨懟，但難以令左丁山明白嘅就係，既然做咗五年校車，蝕到驚，點解有人肯買你間公司，等閣下袋番成千萬銀呢？俗語云，殺頭有人做，蝕本生意冇人做，既然有人肯將間蝕本公司買入，買家有乜揸拿呀？牌照有價，可能係因為運輸署嚴格審批，不發新牌，人為地推高牌照之故，故此讀者Ｃ經營校巴公司時，對運輸署抱怨不止，但依家可以安樂退休，唔多唔少，都係運輸署送嘅大禮啫！凡政府干預市場，就會有人得益，得益多與少，要睇個人造化咯。