許廷鏗(Alfred)今日去到九龍灣出席主題cafe開幕禮，Alfred自細都鍾意畫漫畫，今日佢就發揮藝術天份，即場用朱古力醬畫咗幅自畫像甜品，相當神似，佢話：「我細個畫漫畫，都有畫過呢個公仔，都鍾意食布甸。」

Alfred仲話今日整甜品係試吓身手咁話，佢自爆之前同胡鴻鈞一齊拍飲食節目，齊齊去韓國學整人蔘雞：「大家都唔熟悉煮嘢，嗰次都幾亂㗎，整到好火滾。」同胡鴻鈞老友到傳出hehe情，問Alfred閒時有冇同胡鴻鈞煮吓飯仔？Alfred笑話：「好少啦，講到好似幽會咁，就算聖誕節都係一班人一齊啦，今年真係諗住一班人一齊過，佢得閒就過嚟啦，因為同頒獎禮好近，都唔會出去玩，要準備吓。」Alfred仲話叱咤頒獎禮，一定會投票畀胡鴻鈞，佢話：「all in畀佢，佢第二年參加，第一年入圍最喜愛男歌手五強，其實都好難㨂，有啲做歌畀我，又啲仲同我傳緋聞。」

更多娛聞，喺晒《娛果》
http://fb.com/appledailyent