46歲陳松伶同37歲張鐸結咗婚6年，松松一直恨生BB，原來佢曾經試過凍卵，但都唔成功。今日松松接受《蘋果》訪問時話：「係呀，喺啱啱結婚嗰段時間，但係到咗自己覺得適合年齡懷孕，自己身體基能又唔得，唔成功。」

雖然生唔到BB，不過未有放棄做媽媽嘅心願，松松計劃領養，而且仲係領養一啲殘疾孤兒。松松話：「一直以嚟都好想領小朋友，0依家好多遺孤，希望可以盡力量去照顧佢哋，到我結咗婚有個家庭，真係好需要另一半去支持。我唔可以咁偉大講我去照顧一個殘疾孤兒，譬如係輕度腦癱、手腳唔協調，我覺得我可以從淺入深慢慢領養一個、兩個、三個，跟住兒孫滿堂，講唔埋以後會有咁一日，我希望喺呢方面尋求多啲知識，去做好多輔導工作，甚至輔導國內家庭領養殘疾孤兒。」

松松話老公張鐸從來未接觸過孤兒院，所以日前佢同老公去天津探訪殘障孤兒時，對佢老公造成頗大衝擊。松松話：「張鐸外表其實比較cool，唔係喜怒形於色嘅人，但係其實佢心情好澎湃，嗰日接觸完啲小朋友之後，佢內心有好多好多感情，當時佢對住啲小朋友都會表現得比較有距離，因為佢好怕自己情緒控制唔到，到食飯嘅時候，佢私底下同我講唔想再見到咁嘅畫面，我哋係咪可以令到呢啲畫面消失，令到小朋友可以搵到屋企，或者我哋可以做到啲乜嘢，跟住就開始眼濕濕。」

松松話領養小朋友係一個好長遠嘅責任，做父母需要全心全意照顧佢哋，加上領養一個身體殘障嘅小朋友，愛心同金錢上嘅輔助都係必需，松松又話：「我想領養一位兩歲嘅小妹妹，或者係啱啱被送去孤兒院嘅小朋友，咁對於同我嘅感情建立會係更加健康健全。」

緊貼「蘋果VR」熱潮，打開雙眼隨意門，讓「蘋果VR」陪您探索新世界： https://goo.gl/b5RQAB
「蘋果VR」App
App store下載： https://goo.gl/0kW2cK
Google Play下載： https://goo.gl/4K7EHw