今朝早（21日），炒飯哥羅理雅本身操完文家良馬房嘅「歡樂小子」後，就諗住踩單車回騎師宿舍休息，咁啱途中遇上手持快勞嘅文家良，騎者即時停車同練者講幾句，而呢個時刻就剛好俾《蘋果》攝記捕捉得到，鍾意捉晨操動態嘅馬迷，又點可以唔留意呢對騎師今期周六（23日）嘅合作賽駒呢！

炒飯哥今期同文家良合作唔算話好多，只有第七場「清褔」及尾場「歡樂小子」，其中「歡樂小子」上仗縮落跑1400米，即有突破性嘅進展，僅敗今季不敗馬「以奇用兵」，今仗再戰同程兼第四度配炒飯哥，有望補中。