林盛斌（Bob）份人一向好識搞笑，不過早前疑因飲醉酒，同惠州政協陳小春有啲衝突，好在最終Bob公開道歉，阿Bob噚晚同今晚喺灣仔伊利沙伯體育館搞咗兩場「Bob'sUp伊館2015」楝篤笑，鄭融、劉威煌同吳若希撐場睇騷，而側田同草蜢就做嘉賓。

Bob話題有講工作、家庭，仲玩盡熱爆娛樂人物，郭富城、特首梁振英個女梁齊昕同陳冠希全部有份。噚日爆出「洗米嫂」陳慧玲（Heidi）同老公「洗米華」周焯華離婚，咁啱Bob講到噚晚邊個想搞離婚派對司儀，觀眾高呼洗米華要搞，Bob淆底避談：「呢par我唔夠膽講住，你哋慢慢傾啦。」

城城近日喺微博po拖手相自爆父女戀，講到城城搭上細佢一截o既0靚模方媛（Moka），Bob抵死話：「啲人成日話我好有父愛，似城城，我當然會祝福城城，佢好錫女仔，一手揸車，一手拖住隻手，佢好錫個女呀。唔係，係好錫條女，香港好多父愛。」Bob仲讚梁齊昕都好錫個老竇梁振英：「就算佢幾唔鍾意老竇，都冇打佢老竇，只係打佢老母，呢啲就係父愛。」Bob話想當年新人，佢喺電台做，拎紙仔搵歌手錄音，佢話：「我見到有個藝人，佢將我張紙掉落地，後嚟佢啲相片流出嚟，佢都唔係幾大支嘢啫！」Bob雖然沒指名道姓，但似乎暗示當年淫照男主角陳冠希。

Bob仲玩埋前拍檔，o依家從政嘅慢咇（陳志全），佢話：「慢咇當年教咗我好多嘢，有次佢放假話去尼泊爾修練，只話練自己半透明，原來成功過幾次，佢喺立法會開會，梁振英真係見唔到佢。近日立法會發現有屎，我都懷疑係慢咇啲隱型屎。」

Bob話畀自己處男騷80分，佢話：「第一次做，好緊張。」佢唔敢玩洗米華，Bob話：「佢段新聞好爆，佢係其中一個贊助，希望佢盡快解決件事，我冇資格勸佢，我同佢同Heidi（洗米嫂）都有見面，希望佢哋好好解決件事，始終佢哋家事。」Bob話冇見過Mandy。