交通銀行（3328）發行人民幣債券票面息3.25%，加上人民幣升值因素在內，年回報隨時有7%無走雞，入場費又不貴，只要1萬元就有得玩，從來只愛炒股的星俠都專登叫屋企人不妨認購，好過做定期。順便提醒讀者，隻債券今日「截飛」。
連人仔債券都玩埋，算係分散投資方式一種。股市年內難炒，好似近期港股走勢雖略見轉強，但又怕太多「等錢使」基金或機構投資者趁勢套現，大市即使似見底都好，能否上試23500水平，則成疑問。

主力生產電腦膠機殼的巨騰國際（3336），昨微升0.9%，收報3.38元，走勢呈圓底兜上，如上破3.50元，有力挑戰歷史高位3.73元。
由於市場對手提電腦需求未減，歐美等地仍錄得逾3%增長外，亞洲區更達雙位數字，加上巨騰能將成本轉嫁，故不妨留意，若見失守上升軌3.20元則沽出止蝕。