身邊不時有朋友呻，追女仔最煩係遇着個扭扭擰擰，欲拒還迎，仲周圍講自己被人追嘅。菲菲話你知，好似買股咁，當估值夠吸引，你都即時落盤喇，咁只反映男方整體分數未去到一個值得女方投資嘅水平，周圍唱目的係想令人知自己搶手，抬高身價。
就好似周圍同人講自己要跳樓自殺嘅人，只係「企跳」，唔係真心想跳。套落林煥光度，真係決心唔做行會召集人，就唔會大鑼大鼓話畀人聽唔知辭唔辭好，所以佢最後決定留任係好合理，呢隻叫「跳草裙舞」，唔係「跳船」，佢只係藉此提高自己日後議價能力。結論係，男仔遇到呢種女仔，想開花結果？機會率近零。
其實當人決心去做一件事，事前唔會張揚，以免他人加把嘴煩上加煩。以雨潤食品（1068）為例，早排公司澄清大股東冇挪用公款，之後股價回穩，點知主席祝義材忽然唔撈，殺你一個措手不及，呢啲就名副其實「跳船」。
散戶面對前景咁差嘅雨潤，要果斷沽貨，唔可以扭擰。
Fifi
本欄逢周二、四刊出