焦點美國新股Snowflake首日上市勁升1.1倍，市值705億美元，以最近一年收入約4億美元計算嘅市銷率係175倍！以前覺得市盈率100倍已經好癲，但喺美股狂潮之中，歷史正在改寫。

呢間2012年成立嘅雲端數據庫企業，睇唔明佢業務嘅話，建議上YouTube搵片睇。呢間公司只得3,117客戶就可能創造單季1.33億美元收入，願意每年畀1球嘅客戶由22個升到56個，加上上市令其知名度大增，未來一段日子肯定吸引好多商業客戶，過去收入按年增幅1.2倍，之後都會好高增長。從基本因素同營運數據去睇，的確係難以抗拒嘅一項好投資！問題係賣緊完美價。短期內基金掃貨會令股份需求偏高，當要買嘅基金都買完，其後需求減少，估計股價會由外太空回落至地球嘅藍色天空，想佢貼地啲似乎冇乜可能。打算長線投資呢隻好股嘅話，或者過一段時間個價會更買得落手。

股市霎時間出現資金流逆轉，美元彈，人民幣跌；美股跌，港股更加要跌。恒指從月線、周線圖睇，似一浪低於一浪嘅走勢，7月份挑戰月線保歷加中軸不果，證明指數反彈浪完結，目前似足3月大跌前走勢。不過，螞蟻集團招股同美國大選在即，喺美國無限制量寬之下，似乎足夠撐住環球股市唔跌得太甘，相信ATMX以至美國大型科技股，中短期內chok住整固機會較大，中短期快速破頂機會似乎較微。

-----------------------------

【全球樓行】 Dream House零距離

屬於香港人的移民攻略

-----------------------------

上車必讀天書 「九成按」入市懶人包

點擊即睇《按揭必讀手冊》電子書

----------------------------

支持蘋果深度報道，深入社區，踢爆權貴，即Like蘋果專題及調查組FB專頁！