痛失愛女,四十一歲的陳女士一時間未能接受現實,面容憔悴的她,不時坐在沙發上發呆。「我從來都冇諗過阿倩個病會復發,呢一年嚟,佢精神、胃口都好好,重返緊學,真係冇諗過佢會突然間離開我。」陳女士喃喃地說。
留院七日藥石無靈
年僅十四歲的阿倩,一生命途坎坷。生於單親家庭的她,三年前不幸證實患上骨癌,由於癌細胞迅速沿右臂擴散,為保住性命,阿倩被迫截斷整條右手臂,並停學接受為期八個多月的化療。直至去年,阿倩擊退癌魔,裝上義肢重返校園,滿以為一切事過境遷的時候,豈料卻是暴風雨的前夕。
眼泛淚光的陳女士憶述:「上兩個禮拜,囡囡放學返嚟,突然間話有啲頭暈、氣喘,我已經好穩陣,即刻送佢入醫院,當時囡囡話未做完功課,唔想去,我重應承一做完檢查就帶佢返屋企,點知……。」經醫生診斷,證實阿倩癌病復發,且擴散至心臟,右心室大半部份已被癌細胞侵蝕,藥石無靈。阿倩最終留院七天後病逝,走完短促的一生。