當年今日
關於我們

李八方online|梁君彥忘了誰是誰

蘋果日報 2020/09/18 23:04

梁君彥劉慧卿劉小麗范國威

【新增影片】
現屆立法會真係創先河,先後經已有N咁多人被DQ,多到身為立法會主席嘅梁君彥都記唔晒。梁君彥今日被問到立法會有幾多個議席出缺時,數咗一陣就話「唔記得咗喇」。可見政權DQ先至係「新常態」。
empty
梁君彥數到最後一位嗰陣,竟然唔記劉小麗,佢攤大手板靜咗幾秒,然後面有難色、笑笑口咁話:「唔記得咗喇」。本報記者攝
empty
被梁君彥遺忘的她…答案在圖中。資料圖片
梁君彥今日(18日)接受民主黨前主席劉慧卿嘅網台訪問,卿姐問到究竟而家立法會有幾多席係空缺嘅時候,梁君彥數到最後一位嗰陣,竟然唔記得今朝被終審法院成功駁回上訴嘅陳凱欣所牽涉嘅劉小麗,佢攤大手板靜咗幾秒,然後面有難色、笑笑口咁話:「唔記得咗喇」,搞到要由卿姐叫秘書處職員提吓佢,幫手打圓場,先至噏得出係劉小麗,都真係幾尷尬。
話口未完,梁君彥喺臨完場嘅記者問答環節入面,又唔記得究竟係邊位議員被法庭裁定為「非妥為當選」,錯口將新同盟范國威講成現任立法會議員民主黨尹兆堅,搞到秘書處職員都忍唔住企起身喺隔離提醒梁君彥,幫佢補鑊。
其實作為立法會主席,開咗咁多次大會、仲命令保安將佢口中搞亂議會嘅民主派逐出議事廳,點解可以咁樣都搞錯呢?八方就真係百思不得其解。
-----------------------------
《蘋果》英文版免費試睇:了解更多
英文版已登錄《蘋果》App,立即下載/ 更新iOS / Android
-----------------------------
支持蘋果深度報道,深入社區,踢爆權貴,即Like蘋果專題及調查組FB專頁