王君馨日前接受商台節目《1圈圈 星光背後》訪問，講到原來當年參選香港小姐獲得亞軍之後，即時被大台重用，但表現太差被網民抨擊，令到佢感到無助，最後更寄情食物大飲大食。

王君馨自爆當年奪得港姐亞軍之後旋即獲安排參加同大陸湖南衛視合作嘅《舞動奇跡2》，當年因為呢個節目，令好多人都認識咗佢，贏埋冠軍連大陸人都認為佢，王君馨梗係開心。

不過王君馨就話：「難得我未卸任就已經有好多機會，係一個好好嘅開始，可能正因為上天知道我開始驕傲，所以就即刻打擊我。」後來佢主持飲食節目《日日有食神》表現太差，對白蒼白無力之餘表情又被兼太浮誇，負評如潮，王君馨就唯有一個人匿喺屋企喊，又將壓力借暴食發洩。

呢個情況維持咗一年，王君馨話直至被趙希洛、周家蔚拉去教會，令佢搵到心中所託，最終改變想法，王君馨仲話因為信仰，令到佢同老公由分手變到終成眷屬：「因為佢妒忌，我哋初初拍拖嗰陣，我喺波士頓讀書，佢喺紐約讀書，我本身係一個有好多朋友嘅人，佢經常喺我嘅social media見到我同一班朋友一齊，佢就會問我『呢個男仔係邊個？』當時我覺得『你點解要問我咁多問題呢？你係唔係唔信我呢？』所以我哋以前經常因此爭吵，後來我哋都信教，喺共同信仰下我哋建立咗一個穩定嘅信任。」